शिवपुरी गाउँपालिका अध्यक्ष रामकृष्ण थापाले स्थानीय सरकार, सरोकारवालासँग समन्वय र छलफल गरी डीपीआर सच्याउन आग्रह गरे । तीनै तहका सरकारबीच समन्वय भए मात्र यो योजना पूरा हुने उनको भनाइ थियो । कृषि तथा पशुपन्छी विकास मन्त्रालयका सहसचिव तेजबहादुर सुवेदीले तीनै तहको सरकारको समन्वयमा उच्चस्तरीय प्राविधिक समितिमार्फत् अध्ययन र कार्यविधि बनाइ कार्यक्रम सञ्चालन गर्न सुझाव दिए । उनले यो पदमार्ग दूरगामी महत्वको रहेकाले केन्द्र सरकार समन्वय र सहयोग गर्न तयार रहेको बताए । कार्यक्रममा प्रांगारिक कृषि विज्ञ गोविन्द शर्मा, गाउ पर्यटन प्रवर्द्धन मञ्चका निवर्तमान अध्यक्ष कमल सापकोटाले र कृषिविद् शरदचन्द्र श्रेष्ठले कार्य पत्र प्रस्तुत गरेका थिए ।नुवाकोटका ककनी–सूर्यचौर–चिसापानी–कुटुमसाङलाई प्राथमिकता दिए पनि यसले काठमाडौं र सिन्धुपाल्चोकलाई समेत जोड्न सहभागीले सुझाव दिएका छन । ककनीका २ र ५, शिवपुरीका ७ वडा र दुप्चेश्वरका २ र ४ वडा समेट्ने प्रस्ताव छ ।