करोडौं मूल्यका अतिक्रमित सार्वजनिक जग्गा फिर्ता ल्याउन अभियान

२१ फागुन, काठमाडौं । काठमाडौं महानगरपालिकाले अतिक्रमण गरिएको सार्वजनिक जग्गा फिर्ता ल्याउने अभियान थालेको छ । सोमबार वडा नं. ३ को वडा भवनसँगै जोडिएको साढे ६ आना जग्गा फिर्ता लिएर अभियानको थालनी गरिएको छ ।

सो जग्गामा होटलले बनाएको एकतले भवनलाई सार्वजनिक सम्पत्तिका रुपमा घोषणा गर्दै महानगर प्रमुख विद्यासुन्दर शाक्यले अब सार्वजनिक जग्गालाई खुल्ला स्थानका रुपमा राखिने प्रतिवद्धता जनाए ।

‘०७२ सालको भूकम्पले हामीलाई ठूलो पाठ पढाएको छ,’ मेयर शाक्यले भने,’सहरी सुन्दरता कायम गर्न, हरियाली बचाउन र आपत् विपद्मा आश्रय लिन पनि खुल्ला स्थानको संरक्षण गर्न जरुरी छ । हामीले त्यसको लागि अभियान थाल्यौं ।’

महानगरका प्रमुख प्रशासकीय अधिकृत धनिराम शर्माले सहरी जीवन व्यवस्थापन सहजताका लागि थालिएको अभियानलाई सकारात्मक लिन र अभियानमा सहभागी हुन सहरबासीलाई आग्रह गरे ।

उनले अहिले कति सार्वजनिक जग्गा अतिक्रमणमा परेका छन् भन्ने एकीन तथ्यांक महानगरसाग नभएको बताए ।

तर, विभिन्न वडा कार्यालयले आफ्नो कार्यक्षेत्रभित्रका अतिक्रमकित सार्वजनिक जग्गाको खोजी सुरु गरेका छन् । अहिले काठमाडौंमा अर्बौं मूल्यबाराबरको सार्वजनिक जग्गा विभिन्न व्यक्ति, समूह र संघसंस्थाले अतिक्रमण गरेको अनुमान छ ।

वडा नं. ३ मा मात्र पनि २०० रोपनीभन्दा बढी सार्वजनिक जग्गा छ । वडा नं. ३ का वडाध्यक्ष दीपक केसीले भने,’आज फिर्ता भएको जग्गा करीव ७ करोड मूल्य बराबरको हो ।

यससँगै विश्वहिन्दू महासंघले प्रयोग गरेको २२ रोपनी र गायत्री समाजले प्रयोग गरिरहेको ४२ आना जग्गा पनि तत्कालै सार्वजनिक प्रयोजनामा फिर्ता ल्याउँदैछौं ।’

वडा नं. ३ मा १३६ रोपनी सार्वजनिक जग्गा रानीबारी पार्कले ओगटेको छ । यसबाहेक चालु आर्थिक वर्षमा यो वडाले १ अर्व मूल्य बराबरको यस्ता जग्गा सार्वजनिक उपयोगमा फिर्ता गराउने लक्ष्य राखेको केसीले बताए ।

महानगरका प्रशासकीय अधिकृत शर्मा महानगरभित्रका सार्वजनिक जग्गा संरक्षण र उचित उपयोगका लागि अभियान थालिएको बताउँछन् ।