उद्यमीहरुसँग वाणिज्य संघको अन्र्तक्रिया

नुवाकोट जेठ ५, नुवाकोट उद्योग वाणिज्य संघ र शिवपुरी गाउँपालिकाको आयोजना तथा पुर्णिमा कार्यक्रमको सहयोगमा शुक्रबार शिवपुरी गाउँपालिकाको शेराबगरमा निर्माण सम्बन्धी उद्यमीहरुसँग एकदिवसीय अन्र्तरक्रिया कार्यक्रम सम्पन्न भएको छ ।

अन्तरक्रिया कार्यक्रममा बोल्दै नुवाकोट उद्योग वाणिज्य संघका अध्यक्ष ताराबहादुर कार्कीले व्यवसायीक योजना र लक्ष्य लिए काम गरेमा मात्र सफलता मिल्ने बताए । उनले व्यवसायिक रुपमा उद्योग स्थापना गरेपनि दक्ष जनशक्तिको अभाव भएको भन्दै दक्ष जनशक्ति उत्पादनतर्फ पनि सबैको ध्यान केन्द्रित गर्नुपर्ने बताए । कार्यक्रममा शिवपुरी गाउँपालिकाका अध्यक्ष रामकृष्ण थापाले योजनाबद्ध रुपमा व्यवसाय छनौट गरेमा व्यवसायमा सफलता मिल्ने उल्लेख गरे । गाउाँपालिका अध्यक्ष थापाले काम गर्छु भन्नेलाई पुजीँको अभाव हुन नदिने प्रतिवद्धता  व्यत्त गरे ।

त्यस्तै सो कार्यक्रममा घरेलु तथा साना उद्योग विकास समिति नुवाकोटका प्रमुख विजय भट्टराईले उद्योगहरु दर्ता जिल्लामा मात्र हुने भन्दै सिंहदरबारको अधिकार गाउँगाउँमा भनेपनि त्यसको महसुस जनताले गर्न नसकेको बताए । उनले स्थानिय तहले अझै पनि उद्योग दर्ता गर्ने अधिकार नपाएको भन्दै व्यवसायीहरु सदरमुकाम नै धाउनुपर्ने अवस्था विद्यमान रहेको जानकारी दिए ।

त्यस्तै गाउँपालिकाका प्रमुख प्रशासकिय अधिकृत किसान न्यौपानेले उद्योग वाणिज्यको क्षेत्रमा किसानहरु एकताबद्ध हुन नसकेको बताए । सो कार्यक्रममा पुर्णिमा कार्यक्रमका उद्यम विकास संयोजक चक्रपाणी तिमल्सिनाले निर्माण क्षेत्रका लघु,साना तथा मझौला उद्यमीहरुको व्यवसाय वृद्धिको लागि कार्यक्रम संचालन गरिएको बताए । उनले स्थानिय तहसँग समन्वय र सहकार्य गरेर गाउँपालिकामा कार्यक्रम संचालन गर्न कार्यक्रम आयोजना गरेको उल्लेख गरे । कार्यक्रममा मेरो माईक्रोफाइनान्सका प्रतिनिधिले बित्तिय साक्षरता सम्बन्धी सहभागीहरुलाई जानकारी गराएका थिए । कार्यक्रममा गाउँपालिकाका ४० भन्दा बढी उद्यमी व्यवसायीहरुको सहभागीता रहेको थियो ।