बालेनले अब के गर्लान् ?

नुवाकोट । मंसिर पहिलो साता यता प्रमुख प्रशासकीय अधिकृत नहुँदा काठमाडौँ महानगरपालिकाको भुक्तानी ठप्प छ ।

कर्मचारीदेखि सफाइ कर्मचारीसम्मले पारिश्रमिक पाउन सकेका छैनन् । भुक्तानी पाउन नसकेपछि कर्मचारीहरु प्रमुख बालेन साहविरुद्ध आन्दोलनको चेतावनी दिएका छन् भने जनप्रतिनिधिहरुले पनि मेयर विरुद्ध आवाज उठाउन थालेका छन् ।

सरकारले खटाएका प्रमुख प्रशासकीय अधिकृत सरोज गुरागाईँलाई मेयर साहले काम गर्न दिएका छैनन् । उनले सरकारसँग नयाँ कार्यकारी अधिकृत मागिरहेका छन् । तर, सरकारले भने या त गुरागाईंले गरेको बदमासीको तथ्यगत जानकारी गराउनु पर्ने अन्यथा उनलाई काम गर्न दिनु पर्ने, उनलाई हटाएर अर्काे प्रशासकिय अधिकृत नपठाउने अडानमा छ । काम गर्न दिन लिखित निर्देशन दिएको छ । मेयर बालेनले मानेका छैनन् ।

प्रमुख प्रशासकीय अधिकृतको अभावमा तीन महिनादेखि आर्थिक गतिविधि ठप्प भएपछि महानगरमा कहिले शिक्षक त कहिले कर्मचारी धर्नामा बस्न थालेका छन्।

सोमबार त्यसैको रिस पोख्दै मेयर बालेनले सरकारको दम्भले महानगरपालिकाको सरसफाइ कर्मचारीले ३ महिनादेखि तलब नपाएको भन्दै चैत्र ११ गते राती सामाजिक सञ्जालमा सरकारलाई टुकुचामा गाड्ने धम्की दिएका थिए ।

त्यतिबेला उनले लेखेका थिए ‘को–कोले, के–के आन्दोलन गर्ने हो, मलाई थाह छैन, अबको एक हप्तामा हाम्रो कर्मचारीले तलब पाएन भने सबैलाई टुकुचामा गाड्दिन्छु! त्यो पछि हेरौँला तिमीहरूको के–के तन्त्र हो !’

उनले दिएको एक साताको समय सिमा चैत्र १८ गते सोमबार नै सकिएको छ । तर, ‘सबैलाई गाडिदिन्छु’ भन्ने धम्की दिने बालेन साहको माग अनुसार सरकराले नयाँ प्रशासकिय अधिकृत पठाएको छैन र पठाउने तयारी पनि गरेको छैन ।

त्यसको अर्थ बालेनको धम्कीलाई सरकारले पूर्णरुपमा बेवास्ता गरेको छ । यति बेला प्रश्न उठिरहेको छ-अब बालेनले के गर्लान् ?

त्यसो त सामाजिक सञ्जालमार्फत मेयर बालेनले सरकारलाई यस्ता धम्की दिनु सामान्य नै हो । उनी कहिले सिंहदरबार जलाउने चेतावनी दिन्छन् त कहिले के । ती धम्कीहरुको औचित्य केवल भाइरल हुनुबाहेक अरु केही देखिएको छैन ।

तर, यस्तै यस्तै धम्कीहरुको कारण मेयर बालेन भने अब क्रमिकरुपमा घेराउमा पर्दै गएको देखिन्छ । पहिले आँखा चिम्लेर हरेक कदममा साथ दिएकी उपमेयर सुनिता डंगोल मात्र होइन, अन्य जनप्रतिनिधिहरुले पनि उनीमाथि प्रश्न उठाउन थालेका छन् । त्यस्तै कर्मचारीहरुले पनि क्रमिकरुपमा उनी विरुद्ध आवाज उठाउन थालेका छन् ।

पुरानो बसपार्कमा निर्माण भइरहेको भ्यु टावरको नक्सा पास विवादमा मेयर बालेनको निर्देशनमा प्रमुख प्रशासकीय अधिकृत सरोज गुरागाईँमाथि छानबिन गर्ने भन्दै उनलाई निलम्बन गरिएको बताइएको छ । जबकी गुरागाईँ महानगरको कर्मचारी हैनन् । स्थानीय तहमा सङ्घीय मामिला तथा सामान्य प्रशासन मन्त्रालयले कर्मचारी खटाउँछ ।

संघिय सरकार र मेयर बालेनबीचको पछिल्लो विवादको मुख्य कडी नै महानगरले गुरागाई माथि कारवाही गर्न पाउने कि नपाउने भन्ने हो ।

गुरागाईँमाथि छानबिन गर्ने भनेर मेयर बालेनले समिति गठन गरे पनि सो समितिको प्रतिवेदन सार्वजनिक भएको छैन । सरकारले त्यो समितिको प्रतिवेदन सार्वजनिक गर्नुपर्ने माग गरे पनि मेयर बालेनले आनाकानी गर्दै आएका छन् ।