गेर्खु स्वास्थ्य चौकीको नव निर्मित भवनको उद्घाटन

नुवाकोट । नुवाकोटको विदुर नगरपालिका वडा नम्बर ११ मा रहेको गेर्खु स्वास्थ्य चौकीको नव निर्मित भवनको सोमवार उद्घाटन गरिएको छ ।

सघन सहरी तथा भवन निर्माण आयोजना धादिङद्धारा निर्माण गरिएको भवनको विदुर नगरपालिकाका प्रमुख राजन श्रेष्ठ र उप–प्रमुख प्रभा बोगटीले स्वास्थ्य चौकीको नव निर्मित भवनको उद्घाटन गरेका हुन् ।

भवन उद्घाटन गर्दै प्रमुख श्रेष्ठले भवन निर्माणले सेवा प्रवाहमा सहयोग पुग्ने विश्वास व्यक्त गर्दै गरे । उनले भौतिक संरचना तयार भएकाले अब स्वास्थ्यका लागि आवश्यक सामग्री व्यवस्थाको लागि नगरपालिका, प्रदेश र सङ्घीय सरकारबिच सहकार्य र समन्वय गर्ने बताए ।

कार्यक्रममा विदुर नगरपालिकाका उप–प्रमुख प्रभा बोगटीले नगर बासीको स्वास्थ्य सेवा प्रवद्र्धनमा नगरपालिकाले काम गरिरहेको बताइन् ।

कुल डेढ करोड रुपैयाँको लागतमा नवनिर्मित १३ कोठे दुई तल्ले भवनको निर्माणसँगै सर्वसाधारणलाई उपचार सेवा प्रभावकारी हुने लक्ष्य रहेको विदुर नपाले जनाएको छ ।

स्वास्थ्य चौकी भवनको निर्माणसँगै दक्षजनशत्ति पनि स्वास्थ्य चौकीमा आउनुपर्ने उनले बताए । कार्यक्रममा महिलाहरूको लागि प्रजनन स्वास्थ्य शिविर र समुदाय स्तरमा क्षयरोग सम्बन्धी सक्रिय खोजपड्ताल कार्यक्रम समेत गरिएको थियो ।

चौकी इन्चार्ज देवकी डोटेलले पहिले साँघुरो कोठा भएका भवनबाट सेवा दिँदै आएकोमा अब सहज हुने बताइन् ।