विदुर मेयर कप बुद्धिचाल प्रतियोगिता हुने

नुवाकोट । प्रथम विदुर मेयर कप बुद्धिचाल प्रतियोगिता हुने भएको छ ।

नुवाकोट जिल्ला बुद्धिचाल संघको आयोजना तथा विदुर नगरपालिकाको सहकार्यमा ४ देखि ६ फागुनसम्म प्रथम विदुर मेयर कप खुल्ला बुद्धिचाल प्रतियोगिता हुन लागेको हो ।

स्विस नियमअनुसार हुने प्रतियोगितामा सहभागी हुन आउने नुवाकोट जिल्ला वाहिरका खेलाडीको लागि बस्नको सुविधा आयोजकले निःशुल्क उपलब्ध गराउने नुवाकोट बुद्धिचाल संघका अध्यक्ष प्रकाश जोशीले जानकारी दिए ।

प्रतियोगिताको विजेताले ४० हजार रुपैयाँ प्राप्त गर्नेछन् । दोस्रो स्थानमा रहने खेलाडीले २० हजार र तेस्रो स्थानका खेलाडीले १५ हजार रुपैयाँ हात पार्नेछन् । यसैगरी चौथो हुनेले १० हजार रुपैयाँ र पाँचौँ हुने खेलाडीले ८ हजार रुपैयाँ जित्नेछन् । त्यस्तै छैठौँदेखि १० औ स्थानमा रहने खेलाडीले  ५ हजार हात पार्नेछन् ।

यस्तै नुवाकोटबाट प्रथम हुनेले २५ रुपैयाँ प्राप्त गर्नेछन् । दोस्रो स्थानमा रहनेले १५ हजार र तेस्रो स्थानका खेलाडीले १० हजार रुपैयाँ हात पार्नेछन् । यसैगरी चौथो हुनेले ७ हजार रुपैयाँ र पाँचौँ हुने खेलाडीले ५ हजार रुपैयाँ जित्नेछन् ।

प्रतियोगिताका खेलहरु ढुङ्गेस्थित याङग्रा होटलमा हुने आयोजकले जनाएको छ । प्रतियोगिता आयोजनाका लागि झण्डै ४ लाख ५० हजार रुपैयाँ खर्च हुने अनुमान गरिएको छ ।

प्रतियोगिताले नुवाकोटको पर्यटन प्रवद्र्धनमा समेत सहयोग पुग्ने नुवाकोट बुद्धिचाल संघको अध्यक्ष प्रकाश जोशीले बताए ।

प्रतियोगितामा भारतसहित नेपालका शिर्ष वरियताका खेलाडीहरुको समेत सहभागिता रहने भएको छ । प्रतियोगितामा सहभागिताको लागि प्रतिव्यक्ति दर्ता शुल्क एक हजार रुपैयाँ लाग्ने बताइएको छ ।

 

सम्बन्धित समाचार

नुवाकोट बुद्धिचाल संघको अध्यक्षमा जोशी