पञ्चकै नक्कल नगरेको भए हुन्थ्यो : तिम्सिना

नुवाकोट । सचिवालय बैठकले आफूलगायत नेतालाई निलम्बन र निष्कासन गर्ने निर्णय गणतान्त्रिक पद्धतिविपरीत भएको एमालेकी निलम्बित केन्द्रीय सदस्य उषाकिरण तिम्सिनाले प्रतिक्रिया दिएकी छन् ।

पार्टीमाथि प्रश्न उठिरहेका बेला पार्टीले आफूलाई निलम्बित गरेकोमा उनको असन्तुष्टि छ ।  एमालेको बुधबार बसेको सचिवालय बैठकले स्थायी कमिटी सदस्य बिन्दा पाण्डे र केन्द्रीय सदस्य तिम्सिनालाई ६ महिनाका लागि निलम्बन गरेको छ ।

मीनबहादुर गुरुङले पार्टी केन्द्रीय कार्यालयका लागि जग्गा र भवन दान दिने र एमालेले लिने निर्णयको आलोचना गरेकामा पाण्डे र तिम्सिना निलम्बनमा परेका हुन् । यसअघि उनीहरूलाई लिखित स्पष्टीकरण सोधिएको थियो ।

पार्टी सचिवालयले निलम्बनको निर्णय लिइरहेका बेला आफू नुवाकोट निर्वाचन क्षेत्र नम्बर १ मा पर्ने गाउँपालिका कमिटीका अधिवेशन सम्पन्न गरेर फर्किइरहेको तिम्सिनाले जानकारी दिइन् । उनी नुवाकोट निर्वाचन क्षेत्र नम्बर १ को इन्चार्ज हुन् ।

पार्टी सचिवालयले लिएको निलम्बनबारे उनले भनिन्, ‘यो नगर्नुपर्थ्यो । यो त गणतन्त्र हो, हाम्रा पञ्चायतविरुद्ध लडेर आएका नेताहरू नेतृत्वमा छन् । प्रजातन्त्र आयो, गणतन्त्र आयो । यो गणतान्त्रिक पद्धति र प्राणलीलाई नसुहाउने काम भयो । पञ्चायतविरुद्ध लडेर आउनुभएका नेतृत्वले पञ्चकै नक्कल नगर्नुभएको भए हुन्थ्यो ।’

पार्टीमा सक्रिय रूपमा लागिरहने पनि तिम्सिनाले बताइन् । ‘पार्टी काममा निरन्तर लागिरहन्छु । योभन्दा उन्नत डेमोक्रेटिक पार्टी प्रणाली स्थापित गर्नुछ ।’ पार्टीहरूमा लोकतान्त्रिक प्रणाली स्थापना गर्न लागिरहने उनको भनाइ थियो ।

पार्टीहरू लोकतान्त्रिक नभएको र संकटग्रस्त भएकाले समाजमा पनि त्यसको प्रभाव परिरहेको उनले बताइन् । ‘राजनीतिमा जानेर वा नजानेरै लागिएको हो । ठूलो मान्छे बनौंला भनेर लागिएको होइन । राजनीतिक जीवनमा यस्ता आइलागेका यस्ता कुराहरूलाई सामान्य रूपमा नै लिइन्छ, पार्टी काममा निरन्तर लागिन्छ,’ उनले भनिन् ।