बालेन र राजनबीच सहकार्य, विदुरको ढुङ्गेधाराको पुन निर्माण हुँदै

नुवाकोट । काठमाण्डौ महानगरपालिका र विदुर नगरपालिका बिच सहकार्य शुरु भएको छ ।

काठमाण्डौ महानगरपालिकाका मेयर बालेन शाह र विदुर नगरपालिकाका मेयर राजन श्रेष्ठबीच २०८१ श्रावण ३ गते भएको छलफल अनुसार विदुर नगरपालिका वडा नम्बर २ को विभिन्न स्थानमा रहेको परम्परागत मौलिक पहिचान बोकेको ऐतिहासिक तथा पुरातात्त्विक ढुङ्गेधाराको (हिटी) पुननिर्माण हुन लागेको हो ।

ऐतिहासिक तथा पुरातात्त्विक ढुङ्गेधाराको (हिटी)को पुननिर्माणको लागि प्राविधिक टोली अध्ययन शुरु गरिसकेको छ । शुक्रवार प्राविधिक टोलीले विदुर नगरपालिका वडा नम्बर २ मा रहेको अंशुवाटिका हिटि र पाटि पानी धाराको प्राविधिक अध्ययन गरि नाप जाँच समेत गरेको हो ।

प्राविधिक टिमहरूबाट हिटी निर्माण गर्ने स्थलको प्राविधिक अध्ययनको काम अगाडि बढेको विदुर नगरपालिकाका मेयर राजन श्रेष्ठले जानकारी दिए । उनले तिहारलगत्तै अन्य हिटिको समेत नाप जाँच गरे। डिपिआर तयार हुने बताए ।

मेयर श्रेष्ठले विदुर नगरपालिका र काठमाण्डौ महानगरपालिकाबीच सहकार्यको शुरुवात भएकोले यसबाट विदुर नगरपालिकाले धेरै लाभ लिनसक्ने बताए । प्राविधिक टोलीले अध्ययन पश्चात छिट्टै हिटी निर्माण कार्य अगाडि बढाउने जानकारी दिएको उनले बताए ।

यस्तै विदुर नगरपालिका वडा नम्बर २ का वडाध्यक्ष दिपक कायस्थले महानगरले विदुरको पाँच पुरातात्त्विक ढुङ्गेधाराको (हिटी) को पुननिर्माण गर्न लागेको भन्दै खुशी व्यक्त गरे ।

महानगरले पहिलो चरणमा विदुर नगरपालिका वडा नम्बर २ मा रहेको पाटि पानी धारा, अंशुवाटिका हिटि, दास धारा, कर्णेल धारा र ओखति पानी धाराको पुननिर्माण गर्न लागेको मेयर श्रेष्ठले जानकारी दिए ।

पहिलो चरणमा पाटि पानी धारा र अंशुवाटिका हिटिको प्राविधि टोलीले अध्ययन गरिसकेको छ । तिहार लगत्तै अन्य धाराहरुको पनि अध्ययन हुने उनले बताए ।

धाराको पुननिर्माण कार्यमा नगरपालिकाका सम्पदा सल्लाहकार यादबलाल कायस्थ लगायतले समेत सहयोग गरिरहेका छन् । नुवाकोटको एतिहासिक साततले दरवार वरपर रहेका धाराको पुराात्विक हिसावले पुननिर्माण्न हुने भएपछि स्थानियहरु समेत खुशी भएका छन् ।