धादिङको गल्छी नजिकै पहिरोले कार बगायो, ४ जना घाइते

नुवाकोट । पृथ्वी राजमार्गअन्तर्गत धादिङको गल्छी नजिकै पहिरोका कारण एउटा कार खोलामा खसेको छ भने यात्रु बसमा क्षति पुगेको छ ।

गल्छी गाउँपालिकाको चिरौदी पुल नजिक खसेको पहिरोले कार सडकबाट तल खोलामा खसालेको हो भने बसमा सामान्य क्षति पुर्‍याएको गजुरिका डीएसपी डिल्लीराज पाण्डेले बताए । उनका अनुसार कारमा सवार ४ जना घाइते छन् । उनीहरुलाई उद्धार गरिँदै छ ।

एआर०११ ७९ नम्बरको भारतीय बसमा क्षति पुगेको हो । कारको भने नम्बर खुलेको छैन । पहिरोको कारण राजमार्ग अवरुद्ध भएको हो । ठूलो पहिरो खसेकोले पन्छाउन समय लाग्ने धादिङ प्रहरीले जनाएको छ ।

पहिरो पन्छाउन निर्माणाधीन सडक आयोजनाको मेसिन प्रयोग गरिएको छ । लगातारको वर्षासँगै आएको पहिरोको कारण सडक अवरुद्ध हुँदा संघीय राजधानी काठमाडौं भित्रिने र बाहिरिने सवारी साधन रोकिएका छन् ।