अध्यक्ष अधिकारीद्धारा मौलिक पोषाक अनिवार्य लगाउन निर्देशन

नुवाकोट । तारकेश्वर गाउँपालिकाका अध्यक्ष शिव अधिकारीले मौलिक संस्कृति झल्किने पोषाक अनिवार्य लगाउन निर्देशन दिएका छन् ।

तारकेश्वर गाउँपालिकाले प्रत्येक साताको बुधबार अनिवार्य रुपमा मौलिक संस्कृति र पहिचान झल्काउने पोषाक लगाउन दिएको निर्देशनको प्रभावकारी कार्यान्वयन भए–नभएको र शैक्षिक सुधारका सम्बन्धमा गाउँपालिका अध्यक्ष अधिकारीले वडा नम्बर २ मा रहेको श्री कृष्ण माध्यामिक विद्यालयको बुधवार छड्के अनुगमन गर्दै अनिवार्य रुपमा मौलिक पोशाक लगाउन निर्देशन दिएका हुन् ।

अनुगमनका क्रममा केही शिक्षकहरुले मौलिक संस्कृति झल्किने पोषाक नलगाएको र विद्यार्थीहरुले न्यून संख्यामा मात्रै लगाएको पाइएकाले १५ दिनभित्र यसको प्रभावकारी रुपमा कार्यान्वयन गर्न अध्यक्ष अधिकारीले निर्देशन दिएका थिए ।

उनले स्थानीय सरकारको निर्णयलाई अटेर गरी बसेमा आवश्यक कानुनी कारबाही गर्ने समेत चेतावनी समेत दिएका छन् ।