मोटरसाइकल चोरीमा संलग्न नुवाकोटका फुयाल प्रहरीको नियन्त्रणमा

नुवाकोट । काठमाडौँको चाबहिलबाट मोटरसाइकल चोरीमा संलग्न नुवाकोटका फुयाललाई ट्राफिक प्रहरीले नियन्त्रणमा लिएको छ ।

नुवाकोट घर भई हाल काठमाडौंको चाबहिल बस्ने २८ वर्षीय सन्तोष फुयाल लाई चावहिलबाट  हिजो ट्राफिक प्रहरीले नियन्त्रणमा लिएको हो ।

वास्तविक नम्बर बागमती प्रदेश ०२-०४९ प ०१९० नम्बरको मोटरसाइकको नम्बर परिवर्तन गरी बागमती प्रदेश ०२-०४६ प ९० १९ राखी चलाइ रहेको अवस्थामा फुयाँललाई ट्राफिक प्रहरीले फेला पारेको थियो । उक्त मोटरसाइकलमा पछाडि सवार स्याङ्तान समेतलाई अनुसन्धानका लागि ट्राफिक प्रहरीले नियन्त्रणमा लिएको हो ।

बागमती प्रदेश ०२-०४९ प ०१९० नम्बरको मोटरसाइक झापाको बिर्तामोड नगरपालिका ८ घर भई हाल अनामनगर बस्ने प्रदिप अधिकारीले गत साउन २० गते हराएको भनी काठमाडौँ उपत्यका ट्राफिक प्रहरी कार्यालयमा खोजतलासको लागि निवेदन दिएका थिए ।

नियन्त्रणमा आएका फुयाललाई थप अनुसन्धान तथा कारबाहीका लागि प्रहरी वृत्त सिंहदरबार पठाइएको काठमाडौँ उपत्यका ट्राफिक प्रहरी कार्यालयका प्रवक्ता प्रहरी उपरीक्षक विश्वराज खड्काले जानकारी दिए ।