विदुरमा खानेपानीको अभाव, धारामा लोडसेडिङ

नुवाकोट । बर्खा लागेपछि विदुर नगरपालिका क्षेत्रमा खानेपानीको अभाव हुन थालेको छ ।

जिल्लाको सदरमुकाम क्षेत्रमा खानेपानीको अभाव भएसँगै पानी वितरण गर्ने संस्था विदुर खानेपानी तथा सरसफाइ उपभोक्ता संस्थाले धारामा लोडसेडिङ गर्न थालेको छ ।

सदरमुकाममा धारामा पानी नखाएपछि मानिसहरुको खानेपानी भर्नको लागि सार्वजनिक धाराहरुमा भिड लाग्ने गरेको छ । बट्टार र विदुरका सार्वजनिक धाराहरुमा पानी भर्न अहिले लाइन लाग्ने गरेको छ ।

विदुर खानेपानी तथा सरसफाइ उपभोक्ता संस्थाले वितरण गर्ने पानी फलाखु खोला मुहान बर्खासँगै बगाउने गरेकाले विगत वर्षदेखि नै खानेपानीको समस्या हरेका वर्खाको समयमा हुने गरेको छ । यस वर्ष पनि असारदेखि विदुर नगरपालिकाको वडा नम्बर १, २, ४ , ५, ६, ८ र ९ का उपभोक्ताले उपभोग गरिरहेको खानेपानीमा समस्या सुरु भइसकेको छ ।

विदुर नगर क्षेत्रमा पानीको अभाव हुन नदिन बट्टारको बोरिङबाट निकालिएको पानी आलो पालोमा वितरण गरिएको संस्थाका अध्यक्ष सञ्जीवबहादुर श्रेष्ठले विदुर खबरलाई बताए । फलाखु मुहानमा गत वर्ष बाढीले बगाएको पाइप मर्मत गरी पानी सञ्चालन गर्न खोजिए पनि खोला धमिलो र पानी पिउन योग्य नभएकाले केही समय पानी नियमित वितरण गर्न नसकिएको बताइएको छ ।

वर्षात् लागेपछि पहिराको कारण धारामा पानी आउन छाडेपछि उपभोक्ता स्थानीय ढुंगेधारा, खोल्साको पानी र आकाशे पानी संकलन गरी उपभोग गर्न बाध्य भएका छन् ।

विदुर नगरपालिकाका आठवटा वडाले उपभोग गर्ने पानी वितरणमा नगरपालिकाले बेवास्ता गरेको तथा परिषद्बाट बजेट नछुट्याएपछि मुहान मर्मत र पाइपलाइन व्यवस्थित गरी वितरण गर्न समस्या भएको गुनासो संस्थाका पदाधिकारीले गरेका छन् ।

तर नगरपालिकाका जनताहरुलाई खानेपानीको अभाव हुन नदिन नगरपालिका लागि परेको मेयर राजन श्रेष्ठले जानकारी दिए ।