एसइईमा नुवाकोटका ७ विद्यालय निल

नुवाकोट । केही दिनअघि सार्वजनिक एसइईको नतिजामा नुवाकोटका सात वटा सामुदायिक विद्यालयको नतिजा शून्य आएको छ ।

शिक्षा विकास तथा समन्वय इकाइ नुवाकोटका परिक्षा शाखा प्रमुख सम्झना थपलियाका अनुसार नुवाकोटका विभिन्न पालिकाका ७ वटा विद्यालयको नतिजा यस बर्षको एसइई मा शून्य आएको हो ।

उनका अनुसार निल हुने विद्यालयमा विदुर नगरपालिका वडा नम्बर ११ गेर्खुको सेतिदेवि मावि, सुर्यगढी गाउँपालिकाको दुधेदेवि मावि, ककनी गाउँपालिकाको अरुणदयो मावि र सरस्वती मावि, बेलकोटगढीको चण्डादेवि मावि, म्यागङ गाउँपालिकाको सिता मावि र दुप्चेश्वरको कमलमाणीक मावि रहेका छन् ।

जिल्लामा अधिकांश विद्यार्थीहरुको गणित, बिज्ञान र अंग्रेजी बिषयमा नट ग्रेडेट आएको शिक्षा विकास तथा समन्वय इकाइ नुवाकोटले जनाएको छ ।

नुवाकोटबाट यस वर्षको एसइई तीन हजार आठ सय ४४ जना विद्यार्थी सहभागी भएका थिए । जसमध्ये एक हजार ६ सय ४५ मात्र उत्तीर्ण भएका छन् । गत वर्ष चैत १५ देखि सुरु भएको एसइईको नतिजा गत बिहीबार सार्वजनिक भएको थियो ।

जिल्लाका एक सय ५० संस्थागत र सामुदायिक विद्यालय एसइईमा सहभागी भए पनि सात विद्यालयको नतिजा शून्य आएको छ । एक विद्यालयको खुला अर्थात् प्राइभेट परीक्षामा सहभागी सबै विद्यार्थी अनुत्तीर्ण भएका छन् ।

परीक्षामा सहभागी कुल विद्यार्थीको ४२.७ प्रतिशत मात्रै उत्तीर्ण भएका छन् । सहभागीमध्ये ५७.३० प्रतिशत अर्थात् दुई हजार एक सय ९९ विद्यार्थी ननग्रेड (अनुत्तीर्ण) भएको शिक्षा विकास तथा समन्वय इकाइ नुवाकोटले जनाएको छ ।