पञ्चकन्यामा एसईईमा ७० प्रतिशत विद्यार्थी फेल

नुवाकोट । नुवाकोटको पञ्चकन्या गाउँपालिकामा माध्यमिक शिक्षा परीक्षा (एसईई)-२०८० मा  ७० प्रतिशत विद्यार्थी अनुत्तीर्ण (फेल) भएका छन् ।

बिहीबार सार्वजनिक एसईई नतिजामा पञ्चकन्या पालिकाभित्रका रहेका १० माध्यमिक विद्यालयबाट सहभागी १ सय ९४ विद्यार्थीमध्ये ६० जना अर्थात् ३० प्रतिशत विद्यार्थीमात्रै उत्तीर्ण भएका हुन् । राष्ट्रिय नतिजामा भने ४७.८७ विद्यार्थी उत्तीर्ण भएका छन् ।

प्राप्त नतिजाअनुसार इन्द्रायणि माविबाट १४ जनाले परीक्षा दिएकामा ४ उत्तीर्ण, राष्ट्रिय माविबाट १९ जना सहभागी भएकामा ८ जना पास भएका छन् भने कालिका माविबाट २४ जनाले परीक्षा दिएकोमा ४ जना मात्र सफल भएका छन् । नवसञ्जीवनी माविमा भने नतिजा अलि सुधार देखिएको छ । जुन विद्यालयबाट ३९ जना विद्यार्थीले एसईई दिएकोमा २७ जनाले पास गरेका छन् ।

पञ्चकन्या माविबाट २४ जना सहभागी भएकोमा ६ जना, उदय जालपा माविबाट १७ ले परीक्षा दिएकामा ४ जना, बच्छला माविबाट ९ मा १ जना र कुण्डला माविबाट २१ जनाले परीक्षामा सामेल भएकोमा ३ जनाले सफलता प्राप्त गरेका छन् ।

भेँडाबारी माविबाट ६ जनाले परीक्षा दिएकामा कुनै विद्यार्थी सफल हुन सकेनन् ।