न्यु ईनारपाटी युवा क्लबको विजयी शुरुवात

नुवाकोट । नुवाकोटको बट्टारमा आजबाट शुरु भएको नुवाकोट जिल्ला लिग फुटवल प्रतियोगिताको उद्घाटन खेलमा न्यु ईनारपाटी युवा क्लबले विजयी शुरुवात गरेको छ ।

न्यु ईनारपाटी युवा क्लबले पिपलटार फुटवल क्बललाई १–० को झिनो गोल अन्तरले पराजित गरेको हो । ईनारपाटीलाई जित दिलाउन जर्सी नम्बर ५ गोविन्द प्रसाद रिमालले खेलको ४८ औ मिनेटमा पेनाल्टी मार्फत निर्णायक गोल गरेका थिए ।

पिपलटारका खेलाडीले डिबक्समा ईनारपाटीका खेलाडीलाई लडाएपछि रेफ्रीले ईनारपाटीलाई पेनाल्टी दिएको थियो । त्यसमा गोविन्द सफल बने ।

जितसँगै तीन अंक जोड्दै न्यु ईनारपाटी युवा क्लब समुह ए को शीर्ष स्थानमा उक्लिएको छ । खेलको म्यान आफ दी म्याच न्यु ईनारपाटी युवा क्लबका कप्तान विकास लामिछाने घोषित भए ।

प्रतियोगिता अन्र्तगत बुधवार दुई खेल हुनेछन् ।  दिनको पहिलो खेलमा समुह बि मा रहेको वनदेवि युवा क्लबले न्यु स्टार क्लबसँग विहान ८ बजे प्रतिष्पर्धा गर्नेछ भने दिउँसो ४ बजे देविघाट जालपा क्लबले कोलनी युथ सर्कलसँग प्रतिष्पर्धा गर्नेछ ।

प्रतियोगितामा नुवाकोटको विभिन्न १२ ओटा क्लबले सहभागिता जनाएका छन् ।  लिगको विजेताले ५० हजार रुपैयाँ र उपविजेताले २५ हजार रुपैयाँसहित ट्रफी, मेडल र प्रमाणपत्र पाउने नुवाकोट फुटवल संघका अध्यक्ष देवनारायण चित्रकारले जानकारी दिए ।

लिगमा सहभागि भएका १२ क्लबमध्ये दुई क्लब घटुवामा पर्नेछन् ।