जन्मदिनमा आमाको माया छात्रवासलाई खाद्यान्न सहयोग

नुवाकोट । विदुर नगरपालिका वडा नम्बर १० भैसेका समरसिद्धि घिमिरेले विदुर नगरपालिका वडा नम्बर २ मा रहेको आमाको माया छात्रवासमा आफ्नो जन्मदिनको अवसर पारेर खाद्यान्न सहयोग गरेका छन् ।

आफ्नो ७ औ जन्मदिनको अवसर पारेर घिमिरेले वुवा विजय घिमिरे र आमा प्रतिक्षा अधिकारीसहित छात्रवास पुगेर छात्रवासमा आश्रय लिइरहेका बालकहरुको लागि खाद्यान्न सहयोग गरेका हुन् । वितरण गरिएको सामाग्रहरुमा चामल, दाल, तेल, नुन र प्रेसर कुकर लगायत रहेका छन् ।

जन्मदिनमा फजुल खर्च गर्नुभन्दा सामाजिक कर्ममा जोडिन पाएकोमा उनका वुवा विजयले खुशी व्यक्त गरे । सामाजिक भावना र यसको जगमा गरिने विभिन्न कर्महरुबाट आश्रम चल्दै गएको संचालक सोमप्रसाद पाण्डेले जानकारी दिए ।

नुवाकोटको सदरमुकाममा सञ्चालित भएपनि आश्रम सहयोगकै भरमा चल्दै आएको छ । आश्रममा जन्मदिन, वैवाहिक वर्षगाँठ, संघसंस्थाको स्थापना दिवस, परिवारका दिवंगत सदस्यको स्मृति तथा अन्य कार्यहरूमा आर्थिक तथा भौतिक सहयोग आउने गरेको छ ।

आमाको माया छात्रवासमा अहिले २० जना असहाय र गरिव बालिबालिकाहरु बस्दै आएका छन् ।