तादी गाउँपालिका वासीलाई रेडक्रसले निशुल्क रत्त सेवा दिने

नुवाकोट । नुवाकोटको तादी गाउँपालिकाका स्थानियहरुले अबदेखि निशुल्क रत्त सेवा पाउने भएका छन् ।

सोमवार तादी गाउँपालिका र नेपाल रेडक्रस सोसाइटी जिल्ला शाखा नुवाकोटले सो सम्बन्धी सम्झौता पत्रमा हस्तान्तरण गरेका हुन् । तादी गाउँपालिकाको तर्फबाट गाउँपालिका अध्यक्ष सन्तमान तामाङ र नेपाल रेडक्रस सोसाइटी जिल्ला शाखा नुवाकोटको तर्फबाट जिल्ला सभापति हरि श्रेष्ठले सम्झौतापत्रमा हस्ताक्षर गरेका हुन् ।

सम्झौता अनुसार गाउँपालिकाका कुनैपनि स्थानियले आकस्मिक वा जुनसुकै रोगको उपचारमा रगतको अभाव भएमा निशुल्क रगत पाउने छन् ।

पालिकासँग भएको सम्झौता अनुसार सम्बन्धित पालिका वासिलाई अस्पतालमा उपचार गराउदा चाहिने रगत र रक्त तत्व नुवाकोट रक्त सन्चार सेवा केन्द्र र नेपाल रेडक्रस सोसाइटी जिल्ला शाखा नुवाकोटले उपलब्ध गराउने नेपाल रेडक्रस सोसाइटी जिल्ला शाखा नुवाकोटका सभापति हरि श्रेष्ठले जानकारी दिए ।

निशुल्क रत्त सेवा पाउनको लागि सम्बन्धित पालिकाको वासी भएको प्रमाण खुल्ने कागजात चाहिने श्रेष्ठले बताए ।