नुवाकोटमा पहिलो पटक शंख फुक्ने प्रतियोगिता सम्पन्न

नुवाकोट । नुवाकोटमा पहिलो पटक बुधबार शङ्खध्वनि प्रतियोगिता सम्पन्न भएको छ ।

नुवाकोट एफएमले हरिबोधिनी एकादशी २०८० का अवसरमा बुधवार विदुर नगरपालिका– ५ देवीघाटको चौतारामा शंख फुट्ने प्रतियोगिता आयोजना गरेको थियो ।

प्रतियोगितामा धादिङको गल्छी गाउँपालिका वडा नम्बर ७ का सन्तोष सुवेदी प्रथम भए भने नुवाकोटको शिवपुरी गाउँपालिका वडा नम्बर ७ सुनखानीका रविन्द्रप्रसाद पाण्डे द्वितीय र विदुर ११ गेर्खुका सुरज प्याकुरेल तृतीय भएका छन् ।

यस्तै एक मात्र महिला सहभागिता जनाएका विदुर नगरपालिकाकी सिर्जना मुडभरीले सान्त्वना स्थान प्राप्त गरिन् भने शहिद जगत प्रकाशजंग शाह संस्कृत माविमा अध्ययनरत छात्र अग्रिम न्यौपानेले पनि सान्त्वना स्थान प्राप्त गरे ।

प्रतियोगितामा प्रथम, द्वितीय र तृतीयले क्रमशः दश हजार, सात हजार र पाँच हजार रुपैयाँ नगदसहित सम्मान र मायाको चिनो प्राप्त गरेका छन् । यस्तै, सान्त्वनाले तीन हजार रुपैयाँ, मायाको चिनो र प्रमाण–पत्र प्राप्त गरेका छन् ।

विजेतालाई बागमती प्रदेशसभाका सदस्य रमेशकुमार महत र विदुर नगरपालिकाकी प्रभा बोगटीले संयुक्तरुपमा पुरस्कार वितरण गरे । प्रतियोगितामा एक महिलासहित ५९ जनाले सहभागिता जनाएका थिए ।

नेपाली मौलिक कला, धर्म र संस्कृतिको जगेर्ना गर्दै भावी पुस्तालाई शङ्ख बजाउने कला हस्तान्तरण गर्न प्रवद्र्धन गर्ने उद्देश्यले सनातनी हिन्दू धर्मका विभिन्न संस्कारमा नभइनहुने शङ्खको उपयोग, संरक्षण र संवद्र्धनार्थ पहिलोपटक बागमती प्रदेशस्तरीय शङ्खध्वनि प्रतियोगिता आयोजना गरिएको एफएमका स्टेसन म्यानेजर श्रीराम अधिकारीले जानकारी दिए ।

शङख् दिनानुदिन लोप हुदै गएकोले युवा पुस्तालाई यसको संरक्षणमा लाग्न उत्परेणा जगाउन प्रतियोगिता आयोजना गरिएको आयोजकको भनाइ रहेको छ ।