त्रिशुली बसपार्कमा टिमुरे यातायातले बनायो विद्युतीय सवारी चार्जिङ स्टेसन

नुवाकोट । नुवाकोटको विदुर नगरपालिका वडा नम्बर १ को त्रिशुली बसपार्कमा विद्युतीय सवारीसाधनका लागि चार्जिङ स्टेसन निर्माण गरिएको छ ।

टिमुरे यातापात प्रालिले झण्डै ३० लाख रुपैयाँको लागतमा चार्जिङ स्टेसन निर्माण गरेको हो । विदुर नगरपालिका वडा नम्बर १ को त्रिशुली वसर्पाकमा टिमुरे यातायात प्रालिले आफ्नै लगानीमा विद्युतिय चार्जिङ्ग स्टेसनको निर्माण गरेको हो । टिमुरे यातायात प्रालिले काठमाण्डौ–त्रिशुली रुटमा संचालन गरेको ई–माईक्रोको लागि विद्युतिय चार्जिङ्ग स्टेसनको निर्माण गरिएको टिमुरे यातायात प्रालिका अध्यक्ष प्रकाश जोशीले विदुर खबरलाई जानकारी दिए ।

विदुर नगरपालिका वडा नम्बर १ का वडाध्यक्ष लेनिन रन्जितको पहलमा विद्युत प्राधिकरणले ट्रान्सफरमर सहित अन्य प्राविधिक सहयोग गरेपछि झण्डै ३० लाख रुपैयाँको लागतमा चर्जिङ स्टेसन निर्माण गरिएको उनले बताए । नुवाकोटमै पहिलो पटक आफुहरुले निजि क्षेत्रबाट चार्जिङ स्टेसन निर्माण गरेको उनले जानकारी दिए ।

चार्जिङ स्टेसनमा सबै किसिमका आम उपभोत्ताले गाडी चार्ज गर्न पाउने उनले बताए । चार्ज गरेवापत प्रति युनिट सात रुपैयाँ महसुल तिर्नपर्ने बताईएको छ ।

आन्तरिक रुपमा विद्युत खपत बढाउने महत्वपूर्ण क्षेत्र यातायात भएकोले सकारको नितिलाई सहयोग गर्नका लागि आफुहरुले चार्जिङ स्टेसन निर्माण गरि ई–माईक्रोको संचालन गर्न लागेको अध्यक्ष जोशीको भनाई छ । पहिलो चरणमा दशैबाटअघिबाट काठमाण्डौ–त्रिशुलीको रुटमा ३ ओटा ई–माइक्रो संचालन गरिरहेको उनले बताए । थप ७ ओटा ई–माइक्रो आउने तयारी भइरहेको जोशीको भनाई रहेको छ ।

पहिलो चरणमा काठमाण्डौ–त्रिशुलीको रुटमा १० ओटा ई–माईक्रो संचालन गर्न लागेका छौ, यो सफल भएमा अन्य रुटमा समेत सेवा विस्तार गर्ने लक्ष्य लिएको जोशीले बताए । ई–माईक्रो संचालन गर्दा केही खर्च कम हुने भएकोले पेट्रोलियम पदार्थबाट संचालन हुने यातायाताको भन्दा भाडा केही सस्तो हुने समेत उनले बताए ।

नेपालले वर्षेनी पेट्रोल आयातमा खर्बौ रुपैयाँ व्यापार घाटा व्यहोरिरहेको छ । नेपालको नदिमा प्रशस्त पानी भएको कारण नेपालमा विद्युत बढी उत्पादन हुने र नेपालले विद्युतिय गाडी प्रयोगमा ल्याउन सके जलविद्युतले बजार पनि प्रश्स्तै पाउने हुँदा देशको अर्थतन्त्रमा ठुलो टेवा दिने विश्वास गरिएको छ ।