छैठौ दशैँ खसि कप फुटबल प्रतियोगिता शुरु

नुवाकोट । विदुर नगरपालिका वडा नम्बर ६ ईनारपार्टीमा शनिवारदेखि छैठौ दशैँ खसि कप फुटबल प्रतियोगिता शुरु भएको छ ।

ईनारपाटी युवा समुहको आयोजनामा भएको प्रतियोगिताको उद्घाटन वडाध्यक्ष श्यामकृष्ण चालिसेले गरेका हुन्।प्रतियोगिताको उद्घाटन गर्दै वडाध्यक्ष चालिसेले प्रतियोगिताले वडामा रहेका खेलाडीहरुको प्रतिभा प्रस्फुटन हुने विश्वास व्यक्त गरे ।

वडाध्यक्ष चालिसेले वडा कार्यालय सदैव युवाहरुको क्षमता विकासमा केन्द्रित रहने भन्दै आगामी दिनमा अझै वडालाई खेलकुदमय बनाउन लाग्ने प्रतिवद्धता व्यक्त गरे ।

प्रतियोगिताको पहिलो खेलमा न्यु ईनारपाटी युवा क्लबले विजयी शुरुवात गरेको छ । आयोजक टोली ईनारपाटी युवा समुहलाई ५–१ गोल अन्तरले पराजित गर्दै न्यु ईनारपाटीले विजय शुरुवात गरेको हो ।

लिगकम नकआउटका आधारमा संचालन हुने प्रतियोगितामा विभिन्न ६ ओटा क्लबको सहभागिता रहेको छ । प्रतियोगिताको विजेताले खसी, ट्रफी, मेडल र प्रमाणपत्र पाउनेछन् भने उप–विजेताले बोका, ट्रफी, मेडल र प्रमाणपत्र पाउने आयोजकले जनाएको छ ।

प्रतियोगिताको उद्घाटन कार्यक्रममा पिपलटार फुटसल क्लबका अध्यक्ष उद्धव पनेरु, निर्माण व्यवसायी श्याम लामा, विदुर ६ का वडा सचिव ठाकुर केसी लगायतको उपस्थिति रहेको थियो ।