नुवाकोट महोत्सव जुवाको अखडा बन्दै

नुवाकोट । सातौ नुवाकोट महोत्सवमा उपहार र चिठ्ठाको नाममा जुवा खेलाईएको छ ।

कृषि, व्यापार, उद्योग, पर्यटनलगायत कुना–कुनामा लुकेका प्रतिभा प्रस्फुटन गर्नुका साथै विभिन्न धर्म, संस्कृतिको उजागर गर्न भन्दै आयोजना गरिएको महोत्सव मुल गेटमै जुवाको अखडा राखिएको छ ।

उत्पादन, व्यापार तथा विभिन्न क्षेत्रका तीन सय स्टलमध्ये करिव चारष्टा स्टलमा निषेधित चिठ्ठाको व्यापार गरिएको भएपनि प्रहरी र प्रशासन रमिते बनेको छ ।

जिल्ला प्रशासन कार्यालय नुवाकोटले १७ बुँदे शर्त राखेर मात्र महोत्सव गर्न दिएपनि पहिलो दिनदेखिनै आयोजक नुवाकोट उद्योग वाणिज्य संघले अटेरीपन देखाएको हो ।

महोत्सव सञ्चालनको लागि प्रशासनद्वारा जारी अनुमति पत्रको बुदाँ नम्बर २ मा “जुवा, तास अन्य खेलहरु खेलाउन पाईने छैन” उल्लेख गरेको छ । तर शुक्रवार महोत्सव शुरु भएकै दिनदेखि चिट्ठा खेलाउन शुरु गरिएको हो ।

कानुनी रुपमा चिठ्ठा सञ्चालन गर्नका लागि प्रशासनबाट कुनै पनि किसिमको कानुनी इजाजत नलिएतापनि तीन स्टलमा भने चिठ्ठालाई आयोजकले अनुमति दिएको हो ।

भाग्य परीक्षा, उपहारको नाममा राखिएको स्टलमा ५० रुपैयाको टिकट काटेर नम्बर लिन लगाउने र लिएको नम्बरमा तीरद्वारा निशाना लगाउँदा “परे पुरस्कार नपरे नमस्कार” भन्दै पठाउने गरेको पाईएको हो ।

महोत्सवमा अवैध रुपमा चिठ्ठा खेलाईदा पनि प्रहरी र प्रशासन भने रमिते बनेका छन् । दिनहुँ महोत्सवको लागि भन्दै दुई दर्जन प्रहरी खटिदा समेत चिठ्ठा बन्द नभएको भन्दै सरोकारवालाहरुको मिलेमतोमा चिठ्ठा संचालन भएको हो कि भन्ने आशंका व्यक्त गरेका छन् ।