कांग्रेस प्रवक्ता डा. महत नुवाकोटबाट पहिलो नम्बरमा सिफारिस

नुवाकोट । नेपाली कांग्रेसका प्रवक्ता एवम् पूर्वमन्त्री डा.प्रकाशशरण महत नुवाकोटमा प्रत्यक्षतर्फ प्रतिनिधि सभाका लागि सिफारिसमा परेका छन् ।

नुवाकोट कांग्रेसले प्रतिनिधि सभा र प्रदेशसभाका लागि डा.महतसहितका १ सय २७ उम्मेदवार सिफारिस गरेको छ ।

नुवाकोट क्षेत्र नम्बर १ बाट प्रत्यक्षतर्फ प्रवक्ता डा.प्रकाशशरण महत र केन्द्रीय सदस्य डा.रामशरण महतलाई सिफारिस गरिएको क्षेत्रीय सभापति धुव्र श्रेष्ठले बताएका छन् । समानुपातिकतर्फ ६ जनालाई सिफारिस गरिएको छ ।

प्रत्यक्षमा समेत नाम समावेश भएका डा.रामशरण महतलाई समानुपातिकतर्फ १ नं. मा सिफारिस गरिएको छ । अन्य उम्मेदवारमा डा. केदारनरसिंह केसी, कल्पना नेपाली, कृष्णबहादुर लामा, प्रकाश गोतामे र सीता मिजार छन् ।

प्रतिनिधिसभा निर्वाचन क्षेत्र नं. २ बाट प्रत्यक्षतर्फ तीन जनाको नाम सिफारिस गरिएको छ । प्रत्यक्षतर्फ केन्द्रीय सदस्य बहादुरसिंह लामा तामाङसहित राज्यलक्ष्मी पाँडे श्रेष्ठ र लालीमाया तामाङलाई सिफारिस गरिएको छ ।

केन्द्रीय सदस्य अजुर्ननरसिंह केसीलाई समानुपातिकतर्फ सिफारिस गरिएको क्षेत्रीय सभापति जगतबहादुर तामाङले बताएका छन् ।

समानुपातिकतर्फ केन्द्रीय सदस्य केसीसहित धुव्रप्रसाद अधिकारी र रुक्मिणी सेढाइँलाई सिफारिस गरिएको छ ।

निर्वाचन क्षेत्र नं १ को प्रदेशसभा सदस्यका लागि प्रदेश ‘क’बाट जगदीश्वरनरसिंह केसी, महेन्द्र थिङलगायत १३ जनालाई सिफारिस गरिएको छ ।

समानुपातिकतर्फ पार्टी सभापति रमेशकुमार महत, डा.केदारनरसिंह केसीसहित ३० जनालाई सिफारिस गरिएको छ ।

प्रदेश ‘ख’बाट प्रत्यक्षतर्फ पार्टी जिल्ला सभापति रमेशकुमार महत, जगदीश्वरनरसिंह केसी, अर्जुनप्रसाद न्यौपाने, वैकुण्ठ मिश्रसहित ८ जनाको नाम सिफारिस गरिएको छ ।

निर्वाचन क्षेत्र नं. २ को प्रदेश ‘क’बाट प्रत्यक्षतर्फ जगदीश्वरनरसिंह केसी, रमेशकुमार महतसहित २१ जनाको नाम सिफारिस गरिएको छ ।

समानुपातिकतर्फ जिल्ला सचिव श्रीराम श्रेष्ठसहित १७ जनाको नाम सिफारिस गरिएको छ ।

निर्वाचन क्षेत्र नं. २ को प्रदेश ‘ख’बाट प्रत्यक्षतर्फ जगतबहादुर तामाङ, फैसिङ तामाङ र राजकुमार भट्टराईलाई सिफारिस गरिएको प्रदेश सभापति गणेशमान तामाङले बाए ।

समानुपातिकतर्फ चोकराज शाक्य, सुरेन्द्रराज अधिकारीसहित ११ जनाको नाम सिफारिस गरिएको छ ।