नुवाकोटमा बाढीले ववाल, छहरे–टोखा जाने सडक अवरुद्ध

नुवाकोट ।  मंगलबार राती परेको भीषण वर्षाले नुवाकोटमा घानखेत, पक्की पुल र  जलविद्युत संरचनामा क्षति पुर्‍याएको छ ।

राजधानी काठमाडौ जाने छोटो मार्ग ढिकुरे–छहरे–गुर्जेभन्ज्याङ–टोखा जाने सडक अवरुद्ध भएको छ ।

ढिकुरेबजारभन्दा केही पर तादीखोलामाथि रहेको पक्की पुल ढिकुरेबजारपट्टी आउने भागमा जाली हालेर बनाइएको सडक कटान गरेपछि सडक अवरुद्ध भएको हो ।

उक्त पुल लिखुगाउँपालिका १ र ३ जोड्ने पुल हो । त्यसैगरी तादी र पन्चकन्या गाउँपालिका जोड्ने आँप्रको पक्की पुलमा पनि क्षति भएको छ ।

त्यसैगरी दुप्चेश्वर गाउँपालिका ३ रावतबेसी बाढी पहिरोले सिम्ले र कसेरी खेत बाढीले सखाप पारेको वडाध्यक्ष ध्रुवकर केसीले बताए । वडाध्यक्ष केसीका अनुसार मानवीय क्षति नभएपनि खेत र खेतमा लगाएको धानबाली नष्ट पारेको छ ।

‘सिम्ले र कसेरीमा गरी ५ सय रोपनीमा लगाइएको धानबाली र खेत सखाप भयो,’उनले भने, अझै क्षतिको विवरण संकलन गर्दैछौं ।’ सूर्यगढीगाउँपालिका ५ खारेखोलाले माछापोखरी ल्याउने सिंचाई कुलो र वरिपरिका खेत बगाएको छ ।

हाइड्रोपावरमा क्षति ३ को उद्धार

त्यसैगरी तादी गाउँपालिका ४ र दुप्चेश्वर गाउँपालिका ५ बीच बग्ने तादीखोलामा निर्माण भएको बुद्ध भूमि हाईड्रोपावरमा बाढी परेरका ३ जना कामदारको उद्धार गरिएको छ ।

हाइड्रोपावरको सुरक्षाको लागि बसेका ती कामदार बाढी आएपछि बीचमा रहेको सुरक्षित स्थानमा बसेर ज्यान बचाएपनि दुवैतिर खोलाको बाढीले वारिपारी जान सकेका थिएनन् ।

बुधबार बिहान सकुशल उद्धार गरिएको छ । बाँधमा बाढीले क्षति पुर्‍याएको बुद्धमूमि हाइड्रोपावर कम्पनीका अध्यक्ष पूर्णलाल श्रेष्ठले बताए ।

मानवीय क्षति नभएपनि भारी वर्षाले जिल्लाको पूर्वीभेगमा बाढीले क्षति पुर्‍याएको र क्षतिको विवरण आउन क्रममा रहेको नुवाकोटका प्रमुख जिल्ला अधिकारी नारायणप्रसाद रिसालले बताए ।