कोरोना संक्रमितको संख्यामा नयाँ रेकर्ड, एकैदिन ११ हजार भन्दा बढीमा संक्रमण पुष्टि

नुवाकोट । नेपालमा दैनिक जसो कोरोना संक्रमितको संख्याले नयाँ रेकर्ड बनाइरहेको छ ।

बुुधबार देशभरमा थपिने संक्रमितको संख्या हालसम्मकै धेरै छ । आज कुल ११ हजार ३५२ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयको पत्रकार सम्मेलनमा जानकारी दिइएको छ ।

मन्त्रालयका सहप्रवक्ता डा.समिर कुमार अधिकारीका अनुसार २४ घण्टामा भएको १८,०७८ पीसीआर परीक्षण गर्दा ९,५०२ जनामा संक्रमण पुष्टि भएको छ । यस्तै ५,३३१ एन्टिजेन परीक्षण गर्दा १,८५० जनामा संक्रमण पाइएको पनि उनले जानकारी दिएका छन् । यसरी कुल २३,००९ परीक्षण गर्दा सो संख्यामा संक्रमण पुष्टि भएको हो ।

बुधबार ६१३ कोरोना मुक्त, भएका छन् भने संक्रमणका कारण चार जनाकाे ज्यान गएको छ । २४ घण्टामा गरिएको पीसीआर परीक्षणका आधारमा औसत संक्रमण दर ५२.६प्रतिशत रहेको छ जुन हालसम्मकै धेरै संक्रमण दर हो ।

आज थपिएका संक्रमितमध्ये भक्तपुरमा ५७८ जना, ललितपुरमा १०१९ जना र काठमाडौंमा ४,६६६ जना रहेका छन् । यसरी काठमाडौं उपत्यकामा कुल ६,३४३ जनामा संक्रमण देखिएको मन्त्रालयका सहप्रवक्ता अधिकारीले बताए ।

हाल नेपालमा होमआइसोलेसनमा ४६ हजार ५१५ जना र संस्थागत आइसोलेसनमा एक हजार ४१४ जना गरी कुल ४७ हजार ९२९ जना छन् । संस्थागत आइसोलेसनमध्ये आइसीयूमा १६९ जना, भेन्टिलेटरमा २८ जना र क्वारेन्टिनमा १२६ जना रहेका छन् ।