नुवाकोटमा कोरोना संक्रमित भेटिन छाडे

नुवाकोट । नुवाकोटमा कोरोना संक्रमित भेटिन छाडेका छन् ।

स्वास्थ्य कार्यालय नुवाकोटका अनुसार पछिल्लो दुई सातायता जिल्लामा कोरोना संक्रमितको संख्या घट्दै गएपछि जिल्लामा कोरोना संक्रमित भेटिन छाडेका हुन् ।

कार्यालयका सुचना अधिकारी उत्तमराज खनालका अनुसार हाल जिल्लामा सक्रिय कोरोना संक्रमितको संख्या १६ जनामा झरेको छ ।

सक्रिय कोरोना संक्रमितमध्ये १३ जना होम आइसोलेसनमा र ३ जना अस्पतालमा उपचाररत रहेका छन् ।

नुवाकोटमा हालसम्म कोरोना संक्रमितको संख्या ८ हजार ३ सय ५२ पुगेको कार्यालयका सुचना अधिकारी उत्तमराज खनालले जानकारी दिए । जिल्लामा हालसम्म ८ हजार २ सय ८५ जना कोरोनामुक्त भएर घर फर्किएका छन् ।

नुवाकोटमा कोरोना संक्रमणबाट हालसम्म ५१ जना कोरोना संक्रमितको मृत्यु भएको कार्यालयका सुचना अधिकारी खनालले बताए ।

नुवाकोटमा हालसम्म २८ हजार ५ सय २ जनाको पिसिआर परिक्षण गरेको स्वास्थ्य कार्यालय नुवाकोटले जनाएको छ ।