विदुर खोल्सामा पहिरो गएपछि नुवाकोटमा यातायात अवरुद्ध

नुवाकोट । अविरल वर्षाका कारण नुवाकोटको विभिन्न स्थानमा बाढी र पहिरोले क्षति पुर्याएको छ ।

सोमबार साँझ परेको वर्षापछि आएको बाढीले नुवाकोटको मैथली तालिम केन्द्रको विदुरतर्फको खोल्सामा पहिरो गएर सडकमा क्षति पुगेसँगै सडक पूर्णरूपमा ठप्प भएको छ । पुलमा क्षति पुगेसँगै नुवाकोटको बट्टारबाट विदुर जाने सडक बन्द हुँदा बट्टारबाट जिल्ला सदरमुकामसहित विभिन्न पालिका र रसुवा जाने यातायातको सेवा बट्टारमा नै रोकिएका छन् ।

सोमबार राती नुवाकोटमा भएको ठुलो वर्षाले सडक भासिएर पहिरो गएपछि सडक पूर्णरूपमा अवरुद्ध हुँदा विदुरबाट मैथली ब्यारेक हुँदै बट्टारतर्फ जाने सडक बन्द भएको जिल्ला प्रहरी कार्यालय नुवाकोटका प्रहरी निरीक्षक ललिता ढकालले जानकारी दिइन् ।

उनका अनुसार पुल भासिएसँगै सडकको दुवैतर्फ विच्छेद भएको छ । पैदलयात्रुलाई समेत आउजाउ गर्न कठिन भएको छ । पुल भासिएसँगै विदुर–बट्टारको यातायात अवरुद्ध भएर आपतकालीन सेवा दिने सवारी साधनसमेत आउजाउ हुन सकेका छैनन् । उपयुक्त विकल्पको सडक नहुँदा मर्मतसम्भार गरेर पुनःसञ्चालन नभएसम्म सवारी साधन रोकिनुपर्ने बाध्यता छ ।

अवरोध भएको सडक केहिवेरबाट खुलाउन प्रयास गरिने डिभिजन सडक कार्यालयका प्रमुखसमेत रहेका ‘गल्छी–त्रिशूली–स्याफ्रुबेँसी–रसुवागढी सडक योजनाका प्रमुख नारायणदत्त भण्डारीले जानकारी दिए । उनका अनुसार सडक डिभिजन र योजना कार्यालयका उपकरण र जनशक्ति परिचालन गरेर जतिसक्दो छिटो अवरुद्ध सडक पुनः सञ्चालन गर्न प्रयास गरिने छ ।

यसैबीच सोमवार साँझ परेको वर्षाले जिल्लाको विभिन्न स्थानमा बाढी र पहिरो आई क्षति पुगेका विवरण सङ्कलन हुने क्रममा रहेको नुवाकोट प्रहरीले जनाएको छ ।

यसैविच साेमवार रातीदेखि पहिराे गएर सडक अवरूद्द भएसँगै ‘गल्छी–त्रिशूली–स्याफ्रुबेँसी–रसुवागढी सडकखन्ड अन्तर्गत नुवाकाेटकाे विदुरमा सवारीसाधनकाे लाइन लागेकाे छ ।

रातीदेखि सडक सुचारू नहुँदा मालवाहक सवारीसाधन तथा यात्रुवाहक सवारीसाधनहरू सडक खुल्ने अासमा लामबद्द भएर कुरीरहेका छन् ।