नुवाकोटमा अध्यादेशको विरोधमा युवाहरुको प्रदर्शन

नुवाकोट । दल विभाजनसम्बन्धी अध्यादेशको विरोधमा नेकपा एमाले नुवाकोटका विभिन्न जनवर्गिय संगठनले बुधवार सडक प्रदर्शन गरेका छन् ।

एमालेको निकट युवा संगठन युवा संघ, अनेरास्ववीयु, अखिल नेपाल महिला संघ र नेपाल खेलकुद महासंघले नेकपा एमालेको पार्टी कार्यालय विदुरदेखि विदुर चोकसम्म तथा विदुर चोकदेखि लोकतान्त्रिक चौतारोसम्म प्रदर्शन गरेका हुन् ।

मुलुकलाई अस्थिरतातर्फ धकेल्न सरकारले जनघाती निर्णय गरेको भन्दै युवाहरुले प्रदर्शन गरेका हुन् । प्रर्दशनमा नेकपा एमाले जिन्दावाद, मापसे सरकार मुर्दावाद, दल विभाजनसम्बन्धी विधेयक खारेज गर जस्ता नारा लगाएर युवाहरुले विरोध प्रदर्शन गरेका हुन् ।

बुधबार दलविभाजन सम्बन्धी अध्यादेश राष्ट्रपतिले प्रमाणीकरण गरेपछि नेकपा एमालेको माधवकुमार नेपाल समूह नयाँ दल दर्ता गर्न निर्वाचन आयोग पुगेको छ ।

नयाँ दर्ता गर्न लागिएको दलको नाम नेकपा एमाले समाजवादी राखिएको छ ।