नुवाकोटमै पहिलोपटक वडा कार्यालयद्धारा निशुल्क औषधी वितरण शुरु

नुवाकोट । विश्वव्यापी फैलिएको नोबेल कोरना भाइरसको संक्रमण बढ्दै गएको बेला जिल्लाका जनप्रतिनिधीहरु उत्तरदायी बन्दै गएका छन् ।

कोरना भाइरसका कारण गत वैशाख २२ गतेबाट सुरु भएको लकडाउनलाई कार्यान्वयन गर्न गराउन जनप्रतिनिधीहरु सक्रिय हुदै आएका छन् । लकडानका बेला राहत वितरण देखि अन्य कार्यमा उनीहरु उत्तरदायी बन्दै गएको पाइएको छ ।

सरकारले जारी गरेको लकडाउनका कारण औषधी उपचार नपाएका वृद्धवृद्धा, दिर्घरोगीहरुलाई निशुल्क औषधी वितरण सुरु गरिएको छ । लकडाउनका कारण मर्कामा परेका विदुर नगरपालिका वडा नम्बर ५ को वडाभित्र रहेका असाहय, दलित र विपन्न व्यक्तिहरुलाई वडाले निशुल्क औषधी वितरण शुरु गरेको छ ।

 

जिल्लाको विदुर नगरपालिका वडा नम्बर ५ को वडा कार्यालयले सोमबारदेखि वडाभित्र रहेका असाहय, दलित र विपन्न व्यक्तिहरुलाई वडाका जनप्रतिनिधि र वडाका कर्मचारीको एक महिनाको पारिश्रमिक संकलन गरेर निशुल्क रुपमा औषधी वितरण शुरु गरेको हो । कार्यक्रमको शुरुवातको पहिलो दिन दुई जनालाई एकमहिना पुग्ने औषधी वितरण गरिएको छ ।
पहिलो चरणमा वडा कार्यालयमा बोलाएर औषधी वितरण गरिएको र अर्काे पटकदेखि वडालाई टेलिफोन सम्पर्क गरेर औषधी चाहियो भनेपछि वडामा रहेको स्वास्थ्य चौकीमा रहेका नर्स तथा स्वास्थ्य स्वयमसेवीकाले घरमै गएर सेवा दिने वडाध्यक्ष शिवकुमार चित्रकारले बताए । उनले निशुल्क औषधी वितरण कार्यक्रमलाई निरन्तर जारी राख्ने बताए ।

निशुल्क औषधी वितरण गर्न वडाका जनप्रतिनिधि र कर्मचारीले एक महिनाको परिश्रमिक वापत एकलाख ५८ हजार ७ सय ५६ रुपैयाँ विदुर नगरपालिका वडा नम्बर ५ मा रहेको सहरी स्वास्थ्य चौकीलाई हस्तान्तरण गरेका छन् । औषधीको लागी चाहिने अन्य रकम भने दानविरहरुको सहयोगबाट संकलन गरिने वडाध्यक्ष चित्रकारले बताए ।

 

उनले वडामा रहेका दीर्घ रोगी,अपांगता भएका व्यक्ति, असाहय र विपन्न समुदायका व्यक्तिहरुलाई आवश्यक परे प्रत्येक टोलको घर घरमा पुगेर औषधी वितरण गरिने बताए । वडाध्यक्ष चित्रकारले वडा भित्रमा बसोबास गर्ने वडाका असाहय, दलित र विपन्न नागरिरुलाई विशेष प्राथमिकताका साथ औषधी वितरण गरिने जानकारी दिए ।

वडाका स्थानीयहरुले वडालाई टेलिफोन सम्पर्क गरेर औषधी चाहियो भनेपछि वडाले घरमै सेवा दिन तयार रहेको वडा सचिव शिवहरि गजुरेलले बताए ।

वडा कार्यालयले निशुल्क रुपमा औषधी वितरण गर्न थालेपछि स्थानीयहरु खुसी भएका छन् । उनीहरु भन्छन्, बल्ल सिंहदरबार गाउँमा आएको महसुस भएको छ निशुल्क औषधी पाएका राजेन्द्र नेपालीले विदुर खबरसँग भने । उनले वडाले निशुल्क औषधी वितरण गरेर अभिभावकत्व ग्रहण गरेको भन्दै खुशी व्यक्त गरे ।

यसअघि विदुर नगरपालिका वडा नम्बर ५ को वडा कार्यालयले वडामा रहेका असाहय, दलित र विपन्न व्यक्तिहरुलाई उपचारको लागि त्रिशुली अस्पताल जान निशुल्क रुपमा एम्बुलेन्सको समेत व्यवस्था गरेको थियो ।