बागमती प्रदेश सभाको अधिवेशन जेठ १६ गतेदेखि शुरु हुने

नुवाकोट । बागमती प्रदेश सभाको अधिवेशन जेठ १६ गतेदेखि शुरु हुने भएको छ। प्रदेश सभामा प्रतिनिधित्व गर्ने दलहरुबीच सहमति भएपछि  जेठ १६ गतेदेखि प्रदेश सभा अधिवेशन शुरु हुने भएको हो।

बिहीबार बागमती प्रदेशको प्रदेश सुशासन केन्द्र जावलाखेलमा बसेको सर्वदलीय बैठकले जेठ १६ गतेदेखि प्रदेश सभाको अधिवेशन शुरु गर्ने र बैठकले प्रदेश सभा कसरी चलाउने तथा कोभिड – १९ को महामारीका बिचमा कसरी सहज ढंगले चलाउने भन्ने विषयमा छलफल भएको बागमती प्रदेशका मुख्यमन्त्री डोरमणि पौडेलले बताए।

‘संसद अधिवेशन चल्दैछ। त्यो अधिवेशन चलाउनको निमित्त कस्तो खालको तयारी गर्ने भनेर सर्वदलीय बैठकको आयोजना गरिएको हो। सर्वदलीय बैठकमा हाउस कसरी चलाउने भन्ने विषयमा सहमति जुटेको छ,’ मुख्यमन्त्री पौडेलले भने।