नुवाकोट ।  खगेन्द्र लामिछाने, मेनुका प्रधान लगायतका कलाकारहरुको अभिनय रहेको स्व. छेतेन गुरुङ्ग निर्देशित नेपाली चलचित्र ‘डमरुको डण्डीबियो’ अब नि:शुल्क हेर्न पाइने भएको छ ।

कोभिड-१९ को दोश्रो लहरसँगै भएको लकडाउनको समयमा नेपालमा बस्ने दर्शकको लागि सिनेमाघर एपमा यो चलचित्र निशुल्क उपलब्ध गराईएको हो । चलचित्रका अभिनेता तथा सिनेमाघर एपका खगेन्द्र लामिछानेले लकडाउनको समय मनोरञ्जनपूर्ण र यादगार बनोस् भनेर ‘सिनेमाघर एप’ को तर्फबाट नेपालमा बस्ने दर्शकहरुको लागि भनेर ‘डमरुको डण्डीबियो’ नि:शुल्क हेर्न मिल्ने व्यवस्था मिलाएको बताए ।

‘विश्वलाई नै त्रसित बनाइरहेको कोरोना भाइरसले पछिल्ला दिनमा नेपालीलाई झनै धेरै त्रसित बनाएको छ । हाम्रो लागि यो समय निकै नै कठीन र चुनौतीपूर्ण छ । घरमा बस्दा समय कटाउन गाह्रो हुन्छ ।

त्यो समय मनोरञ्जनपूर्ण र यादगार बनोस् भनेर यो चलचित्र  नि:शुल्क हेर्न मिल्ने व्यवस्था मिलाएका छौँ’, लामिछानेले बताए ।