मानव बेचबिखन गर्ने युवतीलाई १५ वर्ष कैद र जरिवाना

चितवन । चितवन जिल्ला अदालतले मंगलबार मानव बेचबिखन तथा ओसारपसारलगायतका चारवटा मुद्दा खेप्दै आएकी एक युवतीलाई १५ वर्ष कैद फैसला सुनाएको छ ।

न्यायाधीश विष्णुप्रसाद उपाध्यायको एकल इजलासले विभिन्न चार घटनामा संलग्न भएको प्रमाणित गर्दै मकवानपुर, हाँडीखोलाकी २५ वर्षीया उर्मिला तामाङलाई १५ वर्ष कैद सजाय र ६० हजार रुपैयाँ जरिवाना हुने फैसला गरेको हो ।

उर्मिलाको पहिलो मुद्दामा दुई वर्ष कैद, दोस्रोमा ११ वर्ष, तेस्रोमा १२ वर्ष र चौथो मुद्दामा १५ वर्ष कैद सजाय सुनाइएको चितवन अदालतका सूचना अधिकारी केशव पौडेलले जानकारी दिए । चारवटै मुद्दाको कैद सजाय जोड्दा ४० वर्ष हुन आउँछ । सबैभन्दा बढी सजायलाई आधार मानेर उर्मिलाले १५ वर्ष कैद सजाय भुक्तान गर्नुपर्ने सूचना अधिकारी पौडेल बताउँछन् ।

यसै घटनाका दुई आरोपित कालिका नगरपालिका ८ की ३२ वर्षीया चन्द्रमाया रुम्बा र सोही ठाउँकी २८ वर्षीया सुकमाया तामाङले मंगलबार सफाइ पाएका छन् ।

बाबुआमा दुवै नभएकी १८ वर्षीया युवतीलाई विसं ०७१ साउन २० गते किनमेलका लागि नारायणगढबजार आएको समयमा कालिका–८ बस्ने सुकमायाले ललाइफकाइ गरी भारतमा मासिक ५ हजार रुपैयाँमा घरमा काम गर्न पाइन्छ भनेर प्रलोभन देखाएर पठाएको आरोप लागेकोे थियो ।

उनीमाथि नयाँदिल्लीमा उर्मिला तामाङसँग भेट गराएको र उर्मिलाले त्यसकोे एकसातापछि वेश्यावृत्तिमा लगाएको आरोप रहेको थियो । पीडितले प्रहरीमा दिएको बयानमा वेश्यालयमा आफूले दैनिक ३० जनालाई यौन प्यास मेटाउन बाध्य भएको बताएकी छन् ।

०७३ भदौमा दिल्लीमा रहेका एक नेपाली युवाको सहयोगबाट आफू भागेर नेपाल आउन सफल भएको उनले प्रहरीमा दिएको बयानमा उल्लेख छ ।

उक्त घटनाका पीडकहरुलाई चितवन अदालतको ०७३ असोज १३ गतेको आदेशबाट भरतपुर कारागारमा पूर्पक्षका लागि थुनामा राखिएको थियो ।