रसुवामा वन अतिक्रमण बढ्यो

रसुवा । रसुवामा वन क्षेत्रको अतिक्रमण बढ्दै गएको छ । जिल्लामा कुल ३६ दशमलव २७ हेक्टर वन क्षेत्र अतिक्रमणमा परेको डिभिजन वन कार्यालय रसुवाले जनाएको छ ।

कार्यालयको पछिल्लो तथ्यांकअनुसार बौँसेमा ९०, तातोपानीमा ४८, गोदाममा १४, घ्याङमा ८, नागथलीमा ६ र बाहुनडाँडामा ५ घरधुरीले सात सय २५ दशमलव ५६ रोपनी वन अतिक्रमण गरेर वासस्थान बनाएका छन् । त्यसरी वन क्षेत्र अतिक्रमण गर्नेहरू एक सय ७१ घरधुरी रहेको वन कार्यालयको तथ्यांक छ । २०७२ को विनाशकारी भूकम्पपछि वन क्षेत्रको अतिक्रमण अझै बढे पनि अतिक्रमणको तथ्यांक संकलन गरिएको छैन ।

कर्मचारीको अभावमा पछिल्लो समय अतिक्रमणमा परेका स्थानको पहिचान गर्न समस्या भएको कार्यालय प्रमुख शोभा सुवेदीले जानकारी दिनुभएको छ । रसुवा जिल्लामा ०५१ सालदेखि वन क्षेत्र अतिक्रमणमा परेको स्थानीयले बताएका छन् । वन क्षेत्रबाट अतिक्रमणकारी हटाउन ०६८ सालदेखि अभियान चलाइए पनि प्रभावकारी हुन सकेको छैन । करिब सात वर्षमा प्रचार प्रसारका कार्यक्रम गर्ने र अतिक्रमित क्षेत्र खाली गर्न सूचना टाँस्ने काम मात्रै भएको छ । वन ऐन ०४९ र नियमावली ०५१ अनुसार सामुदायिक वन क्षेत्रमा कुनै पनि संरचना बनाउन पाइँदैन । तर, रसुुवामा ऐन उल्लंखन गरी बर्से्नि वन अतिक्रमण हुँदै आएको छ ।