नुवाकोटमा नदीजन्य सामग्रीको अवैध उत्खनन बन्द गर्न प्रशासन कडा हुने

नुवाकोट, नुवाकोटका नदी र खोलाबाट भइरहेको अवैध उत्खनन तथा सङ्कलनलाई कडाइका साथ नियन्त्रण गरिने भएको छ । बुधबार साँझ विदुरमा बसेको जिल्ला अनुगमन तथा समन्वय समितिको बैठकले त्यसको नियन्त्रणमा कडाइ गर्ने निर्णय गरेको हो ।

बैठकमा बोल्दै जिल्ला समन्वय समितिका प्रमुख सन्तामान तामाङले जिल्लामा संचालन भएको अवैध वालुवा उत्खननलाई रोकन सबै इमान्दार हुनुपर्ने बताए । उनले सबैको सहयोगमा मात्र अवैध उत्खननलनई रोक्न सकिने बताए । त्यस्तै नुवाकोटका प्रमुख जिल्ला अधिकारी द्रोण पोखरेलले जिल्लामा भएको अवैध उत्खननले जिल्लामा रहेका प्रशासन र जनप्रतिनिधिको वेइज्जत भएको बताए । प्रजिअ पोखरेलले अवैध उत्खनन रोकने सवालमा असुरक्षा भएका आफु सुरक्षा दिन तयार रहेको बताए ।

त्यस्तै विदुर नगरपालिकाकी उपमेयर गिता दाहालले हाते औजारबाट समेत उत्खनन बन्द गर्नुपर्ने बताइन । उनले मेसिनभन्दा हातले वालुवा निकाल्दा समेत ज्यान जोखिममा रहेको बताए । बैठकमा नुवाकोटका प्रहरी उपरिक्षक कृष्ण पल्लीमगरले अनुगमनमा प्रहरी निस्कदा पहिल्यै तस्करकहाँ फोन पुग्ने गरेको बताए । उनले आफ्नो मातहतका प्रहरीले त्यस्तो काम गरेको भेटिए कारवाही गरिने बताए ।

असारदेखि भदौसम्म (तीन महीना) हेभी उपकरण (स्काभेक्टर) प्रयोग गरेर नदीजन्य सामग्री (रोडा, ढुङ्गा, बालुवालगायत) उत्खनन गर्न नपाइने कानूनी व्यवस्था छ । स्थानीय तहले पनि नदीजन्य सामग्रीको उत्खननका लागि करको ठेक्का लगाउँदा वातावरणीय प्रभाव मूल्याङ्कन (ईआइए) मा यो तीन महीना उत्खनन नगर्ने शर्त उल्लेख गरेका छन् । बर्खायाम शुरु भएसँगै जिल्लाको त्रिशूली नदीसहित तादी, कोल्पु, लिखु, सलाखु, फलाखु, सामरीलगायतका खोलामा हेभी उकरण लगाएर अवैधरूपमा नदीजन्य उत्खनन कार्य बढिरहेको छ ।