घाम लागेको दिन पोखरीका माछा टल्किन्छन् । इन्द्रेणी परेजस्तो देखिन्छन् । पहिला काठमाडौंका हायात, र्‍याडिसन होटलमा यो माछाको अर्डर हुन्थ्यो । उनी पुर्‍याउन जान्थे । अहिले रेस्टुरेन्ट चलाउन थालेपछि आफैंलाई पुग्दैन । अहिले उनका पोखरीमा २५ हजार भुरा हुर्कंदै छन् । पोखरीमा राखेको ९ महिना भयो । एक वर्ष पुगेपछि एउटा माछा २ सय ग्रामको हुन्छ । त्यसपछि निकाल्न थाल्ने उनले बताए । प्रधानमन्त्री कृषि आधुनिकीकरण कार्यक्रममार्फत समेत सहयोग पाए । त्यसैले नयाँ पोखरी थपे । पोखरीबाट निस्कने पानीलाई खपत गर्दै ३ दशमलव ५ किलोवाट बिजुली निकाल्ने उनको तयारी छ । ‘यो जोखिमको पेसा हो,’ उनले भने, ‘जोखिम मोल्न सके आम्दानी राम्रो छ ।’ माछाको रेखदेखमा दम्पती खटिन्छन् । उनका अनुसार बिहान ७ बजे, मध्याह्न १२ बजे र अपराह्न ५ बजे दाना दिनुपर्छ । बेला–बेला माछाको दिसा पाइप लगाएर सफा गर्नुपर्छ । ‘वर्षाको पानी देखेर मात्र यो पेसामा लाग्नु भएन,’ उनले आफ्नो अनुभव सुनाउँदै भने, ‘हिउँदमा पनि पानी नसुक्ने ठाउँमा मात्र पाल्नुपर्छ ।’