संवाद समुहको काम प्रभावकारी भएको सरोकारवाहरुको भनाई

नुवाकोट वैशाख १२,संवाद समुह नुवाकोटले गरेको काम प्रभावकारी भएको सरोकारवालाहरुले बताएका छन ।

संवाद समुह नुवाकोटले विदुर नगरपालिका वडा नम्बर ११ को दुधेगढीमा आयोजना गरेको समिक्षा बैठकमा संवाद समुहले जिल्ला भित्र देखिएको विवादहरु समाधानमा महत्वपुर्ण भुमिका खेलेको बताएका हुन । कार्यक्रममा बोल्दै विदुर नगरपालिका वडा नम्बर ११ का वडाअध्यक्ष तोयानाथ तिमिल्सेनाले संवाद समुहले सडक विस्तार र विदुर नगरपालिकाले बढाएको एकिकृत सम्पत्ति करको विषयमा संवादको माध्यमबाट समस्या समाधानमा सहयोग पुराएको बताए । तिमिल्सेनाले आगामी दिनमा नगरपालिकाले जनतासँग प्रत्यक्ष जोडिएका विषयहरुमा निर्णय लिँदा व्यापक छलफल गरेर अगाडी बढ्न तयार रहेको बताए ।

कार्यक्रममा संवाद समुह नुवाकोटका क्षेत्रिय संयोजक सन्तोष खनालले संवाद समुहमार्फत जिल्लामा रहेका महत्वपुर्ण सवालहरु संवादको माध्यममार्फत अगाडि बढाउन संवाद समुह महत्वपुर्ण काम गरेको बताए । खनालले संवाद समुहमार्फत गल्छी–त्रिशुली सडकखण्ड विस्तार गर्दा समुदायमा परेको प्रभाव,विदुर नगरपालिकाको कर निर्धारण सम्बन्धमा नगरपालिका र स्थानियवासीबिचको विवाद र निजी आवास पुननिर्माणमा देखिएको समस्या लगायतको विषय सहजीकरण गर्न महत्वपुर्ण भुमिका खेलेको बताएका छन । सो कार्यक्रममा उपभोक्ता हित संरक्षण मञ्च नुवाकोटका अध्यक्ष तथा संवाद समुहका सदस्य इन्द्र पण्डितले जिल्लामा देखिएको कुनैपनि जनताको चासोको विषयमा संवाद समुहले सबै पक्ष राखी छलफलको माध्यमबाट समाधानको प्रयास खोजेको बताए । त्यस्तै पुर्वक शिक्षक रामप्रसाद प्याकुरेलले जटिलभन्दा जटिल विषयपनि संवादको माध्यमबाट समाधान गर्न सकिने उदाहरणीय काम संवाद समुहले गरेको बताए ।

पछिल्लो समय संवाद समुह नुवाकोटले लिखु,दुप्चेश्वर,सुर्यगढी र ककनी गाउँपालिकामा योजना निर्माण,कार्यान्वयन तथा सेवा प्रवाहको विषयमा संवाल कार्यक्रमको आयोजना गरिरहेको छ । साथै अन्य स्थानिय तहमा समेत आगामी जेठ महिनासम्ममा कार्यक्रम गरिसक्ने बताएको छ । संवाद समुह नुवाकोटले संवाद प्रक्रियाबाट समस्याको दिगो समाधान र समाजमा शान्ति स्थापनाको लागि जिल्लाका अग्रज,लब्ध प्रतिष्ठित व्यक्ति, नागरिक समाजका अगुवा र दलीय प्रतिनिधिहरु मिलाएर संवाद सुमह बनाएको छ ।