नुवाकोटमा कर्तव्य ज्यान मुद्दाका फरार दोषी २४ वर्षपछि पक्राउ

नुवाकोट । जिल्ला प्रहरी कार्यालय नुवाकोटले कर्तव्य ज्यान मुद्दाका फरार दोषीलाई २४ वर्षपछि पक्राउ गरेको छ ।

विदुर नगरपालिका वडा नम्बर १३ देउडी सुकुम्बासी बस्ने बर्ष ५३ को लक्ष्मण तामाङको हत्या गरेर फरार रहेका नुवाकोटको तारकेश्वर गाउँपालिका वडा नम्बर ५ काभ्रेगाँउ बस्ने माईला भन्ने छेप्पा तामाङलाई प्रहरी चौकी दानसिंह नुवाकोटबाट खटिएको टोलीले पक्राउ गरेको जिल्ला प्रहरी कार्यालय नुवाकोटका प्रवक्ता तिलक भारतीले जानकारी दिए ।

उनलाई तारकेश्वर गाउँपालिका वडा नमबर ५ लिग्लेनीमा लुकीछिपी बसेको अवस्थामा पक्राउ गरिएको हो ।

२०५५ साल बैशाख २० गते लक्ष्मणको हत्या गरि कर्तव्य ज्यान मुद्दामा दोषी ठहर भएका उनलाई उच्च अदालत पाटनले पुर्पक्षका लागि २०५७ माघ ९ गतेको फैसला बमोजिम २० बर्ष जन्म कैद फैसला सुनाएको थियो तर उनी त्यसयता फरार रहेका थिए ।

पक्राउ गरिएका उनलाई जिल्ला अदालत नुवाकोटमा पेस गरेर १९ बर्ष कैद भुक्तानका लागि आजै कारागार कार्यालय नुवाकोटमा चलान गरिएको प्रहरीले जनाएको छ ।