लामिबगैचा सामाजिक युवा क्लबको आयोजनामा रक्तदान कार्यक्रम

नुवाकोट । विदुर ५ तल्लो पिपलटारमा रहेको लामिबगैचा सामाजिक युवा क्लबको आयोजनमा तथा नेपाल रेडक्रस सोसाईटी जालपा उपशाखाको समन्वयमा रक्तदान कार्यक्रम सम्पन्न भएको छ ।

रत्तदान कार्यक्रममा नेपाल रेडक्रस सोसाईटी रत्तसंचार केन्द्र कोलनीको प्राविधिक सहयोग र ब्लड अन रिक्वेस्ट नुवाकोटको समन्वय रहेको थियो ।

रत्तदान कार्यक्रममा बोल्दै विदुर नगरपालिकाका मेयर राजन श्रेष्ठले नगरपालिकाले ब्लड बैंक नुवाकोटको समन्वयमा विदुरका नागरिकहरु लाई निशुल्क रगतको व्यवस्था गरेको बताए । उनले नगरपालिकाले दिएको सेवा नागरिकहरुले लिनुपर्ने बताए ।

यस्तै कार्यक्रममा विदुर नगरपालिका वडा नम्बर ५ का वडाध्यक्ष लिलानाथ न्यौपानेले लामिबगैचा सामाजिक युवा क्लब सधैँ रचनात्मक काममा लागिरहेको भन्दै खुशी व्यक्त गरे । उनले आगामी दिनमा पनि वडा कार्यालय क्लबसँग सहकार्य गर्न तयार रहेको बताए ।

कार्यक्रममा नेपाल रेडक्रस सोसाईटी नुवाकोटका सभापति हरि श्रेष्ठले पछिल्लो समय रगतको अभाव भइरहेकोले यस्ता रत्तदान कार्यक्रम प्रभावकारी भएको बताए । उनले नुवाकोट र रसुवाका जनताले नेपालभर रगत लिँदा कुनै शुल्क तिर्नु नपर्ने समेत जानकारी दिए । श्रेष्ठले नुवाकोटमा रत्तदान लगायतका कार्यक्रमहरुबाट मासिक रुपमा २ सय प्रिन्ट रगत संकलन हुने बताए ।

यस्तै कार्यक्रममा क्लबका अध्यक्ष सुजन गजुरेलले क्बले सामाजिक, सांस्कृतिक र धार्मिक क्षेत्रमा स्थानियहरुसँग सहकार्य गरि अगाडी बढीरहेको बताए । उनले क्लबले सामाजिक अभिवृद्धिको लागि काम गरिरहेको बताउँदै हरेक वर्ष रत्तदान कार्यक्रम आयोजना गरिने प्रतिवद्धता व्यक्त गरे ।

२०७६ सालमा स्थापना भएको लामिबगैचा सामाजिक युवा क्लबले कोरोना महामारीको समयमा असहाय गरिव र विपन्न समुदायका व्यक्तिहरुलाई खाध्यान्न र स्यानिटाइजर वितरण गरेको थियो ।

रक्तदान कार्यक्रममा २८ जना रक्तदाताहरुले रगत दान गरेका थिए ।