नुवाकोटमा मकै चोरेको आरोपमा धादिङका एक युवक पक्राउ

नुवाकोट । नुवाकोटको बेलकोटगढीमा मकै चोर्दै गरेको आरोपमा धादिङका सुदिप परियार सवारीसाधन सहित पक्राउ परेका छन् ।

यहि फागुन २९ गते मंगलवार विहान २ बजेतिर बेलकोटगढी नगरपालिका वडा नम्बर ५ केउरेनीका सन्तोष अधिकारीको आफ्नै घरको पिढिीमा राखेको ८ बोरा मकै चोरेको आरोपमा परियार पक्राउ परेका हुन् ।

परियारले घरमा सबै सुतिरहेको अवस्थामा बा २० च ५४४३ नम्बरको बलेरोमा मकै लोड गरिरहेको अवस्थामा घरभित्रको मानिसले थाहा पाएपनि परियार गाडीको ढाला समेत नलगाई भागेका थिए । तर पछि उनलाई प्रहरीले नियन्त्रणमा लिएको जिल्ला प्रहरी कार्यालय नुवाकोटले जनाएको छ ।

प्रहरीले उनलाई ८ बोरा मकैसहित पक्राउ गरि मुलुकि अपराध संहिता २०७४ को चोरी कसूरमा अनुसन्धान गर्नको लागि जिल्ला अदालत नुवाकोटले सात दिनको म्याद दिएको छ ।

घटनामा समलग्न अन्य फरार व्यक्तिहरुको खोजी जारी रहेको नुवाकोटका प्रहरी नायव उपरिक्षक खगेन्द्र वहादुर खड्काले जानकारी दिए ।