वाग्मती प्रदेश सरकार अल्पमतमा

नुवाकोट । केन्द्रीय सत्ता गठबन्धन फेरिएसँगै माओवादी केन्द्र नेतृत्वको वाग्मती प्रदेश सरकार अल्पमतमा परेको छ ।

वाग्मतीमा माओवादी केन्द्र नेतृत्वको सरकारबाट बाहिरिएको कांग्रेसले समर्थन  फिर्ता लिएको छ । समर्थन फिर्तासँगै अल्पमतमा परेको प्रदेशमा सरकार जोगाउने या नयाँ बनाउने भन्ने हिसाबकिताब भइरहेको छ ।

वाग्मती कांग्रेस संसदीय दलका नेता बहादुरसिं लामाले बुधबार मुख्यमन्त्री शालिकराम जम्कट्टेललाई भेटेर सामूहिक राजीनामा बुझाउँदै सरकारलाई दिएको समर्थन फिर्ता लिएको जानकारी गराएका हुन् । उनले लोकतान्त्रिक व्यवस्थामा सत्ता–प्रतिपक्ष हुनु स्वाभाविक प्रक्रिया रहेको बताए । कांग्रेसले समर्थन फिर्ता लिएसँगै सरकारबाट समेत बाहिरिएको छ ।

संघमा माओवादी केन्द्रसहितको गठबन्धन भत्किएपछि प्रदेश सरकारमा रहनु उचित नभएको भन्दै कांग्रेस मन्त्रीहरूले सामूहिक राजीनामा दिएका हुन् । जम्कट्टेल नेतृत्वको १२ सदस्यीय मन्त्रिपरिषद्मा कांग्रेसबाट ६ मन्त्री थिए ।

मुख्यमन्त्री जम्कट्टेलले गणितीय रूपमा आफू नेतृत्वको सरकार अप्ठेरो स्थितिमा रहेको बताएका छन् । बुधबार साँझ मुख्यमन्त्री तथा मन्त्रिपरिषद्को कार्यालयमा कांग्रेसका मन्त्रीहरूको सामूहिक राजीनामा बुझ्दै मुख्यमन्त्री जम्कट्टेलले नयाँ गठबन्धनअनुसार सत्ता समीकरणको अप्ठेरो परिस्थितिमा रहेको स्विकारेका हुन् । ‘केन्द्रीय गठबन्धनअनुसार प्रदेश सरकार कुन दलको नेतृत्वमा बन्ने अझै टुंगिएको छैन,’ उनले भने ।

११० सदस्यीय प्रदेशसभामा सरकार गठन गर्न ५६ मत आवश्यक पर्छ । नयाँ गठबन्धनमा आबद्ध एमालेका २७, माओवादी केन्द्रका २१ तथा एकीकृत समाजवादीका ७ गरी ५५ मत रहेका कारण बहुमत पुर्‍याउन १ मत अपुग छ । सत्ता गठबन्धनमा आबद्ध अन्य दल वाग्मती प्रदेशसभामा छैनन् । प्रदेशसभामा कांग्रेसका ३७, राप्रपाका १३, नेमकिपाका ३ र हाम्रो नेपाली पार्टीका २ सांसद छन् ।