एरिकाले दिलाइन् नेपाललाई रजत पदक

नुवाकोट । चीनको हाङझाउमा जारी १९औं एसियाली खेलकुदमा कराँते खेलाडी एरिका गुरूङले नेपाललाई रजत पदक दिलाएकी छन् ।

जारी एसियाडको समापन समारोह हुने एक दिनअघि शनिबार कराँतेको कुमुतेतर्फ ६८ केजी माथिको तौल समूहअन्तर्गत सेमिफाइनलमा हङकङकी यान काई होलाई ८–४ अंकले हराउँदै उनी फाइनलमा पुगेकी थिइन् । एरिकाले फाइनल पुगेलगत्तै रजत पदक भने पक्का गरेकी थिइन् ।

त्यसपछि शनिबारै राति स्वर्ण पदकका लागि भएको प्रतिस्पर्धामा एरिक काजकस्तानकी सोफ्या बेरुल्तसेभासँग ३–० अंकले पराजित भइन् । उनले त्यसअघि शनिबार दिउँसो भएको क्वार्टरफाइनलमा जापानकी एजुकी सबाइलाई सेन्सुको आधारमा हराएकी थिइन् । दुवैको समान १–१ अंक भए पनि पहिलो अंक पाएको आधारमा एरिका सेमिफाइनलमा पुगेकी थिइन् ।

विश्व कराँते महासंघको वरीयतामा पाँचौं स्थानमा रहेकी जापानकी प्रतिद्वन्द्वी एजुकी जापान कराँते प्रिमियर लिगमा स्वर्ण तथा कन्टिनेन्टल च्याम्पियनसिपकी पनि स्वर्ण विजेता थिइन् । जसले गर्दा एरिकाको पहिलो खेल निकै चुनौतीपूर्ण हुने ठानिएको थियो । तर, उक्त खेलमा साहसिक प्रदर्शन गरेर निर्धारित समयको खेलमा दुवैले १–१ अंक प्राप्त गरेपछि बराबरी भएको थियो । त्यसपछि खेल विजेताको निर्णय ‘सेन्सु’ को आधारमा भयो । जसमा एरिकाले बाजी मारिन् ।

उक्त जितपछि उनले सेमीफाइनलमा हङकङका खेलाडीलाई उत्कृष्ट खेल पस्किँदै पराजित गर्न सफल भइन् र नेपाललाई ऐतिहासिक रजत पदकको सामु पु¥याइन् । फाइनलमा पराजित भएपछि एरिकाले भनिन्– ‘मैले आफूले सकेको प्रयास गरेँ । फाइनल जित्ने प्रयास पुरा हुन सकेन ।’

एरिकाले नेपालका लागि जारी एसियाली खेलकुदमा दोस्रो पदक पक्का गरेकी हुन् । यसअघि नेपालले कबड्डीमार्फत् कांस्य पदक भित्राएको थियो ।

नौ वर्षअघि मनमैजु डोजोमा कराँते खेल्न सुरु गरेकि उनले यस्तो ऐतिहासिक उपलब्धि हासिल गर्न सफल भएकी हुन् । रजत पदक जितेपछि खुसी हुँदै देशको लागि रजत जित्न सकेकोमा निकै खुसी भएको बताइन् ।