हाप्किडो संघ नुवाकोटको अध्यक्षमा गुरुङ

नुवाकोट । नुवाकोट हाप्किडो संघको  अध्यक्षमा विकास गुरुङ चयन भएका छन् ।

हाप्किडो संघ बागमती प्रदेशका अध्यक्ष मनोज लामाको सभापतित्व भएको नुवाकोको जिल्ला भेलाले उपाध्यक्षमा सुमन घिमिरे र विरेन्द्र गुरुङ, सचिवमा सुमित्रा गुरुङ र कोषाध्यक्षमा प्रविण गुरुङ चयन भएका छन् ।

यस्तै भेलाले सदस्यहरुमा दिनेश गुरुङ, निमेश गुरुङ, रमेश तामाङ, समिर गुरुङ, विमला गुरुङ र अस्मि गुरुङलाई चयन गरेको छ ।

यस्तै भेलाले सल्लाहकार समिति समेत गठन गरेको छ जसको संयोजकमा मनराज गुरुङ र सदस्यहरुमा भिमबहादुर तामाङ, अम्बर तामाङ र भैरव कार्की रहेका छन् ।

के हो त हाप्किडो खेल ?

‘हाप्किडो’ विशेष गरेर कोरियन मार्शल आर्ट्स खेल हो । यो खेलको उत्पत्ति दक्षिण कोरियामा सन् १९४८ मा भएको हो । यो खेलको जन्मदाता चाई योङ्ग सुल हुन् । सुलको जन्म सन् १९०४ मा दक्षिण कोरियामा भएको थियो । सुलले मार्शल आर्ट्सका विभिन्न विधाबाट प्रभावित भएर आफ्नो कलामा आधारित ‘हाप्किडो’ लाई मार्शल आर्ट्स खेलको रुपमा विकास गरेका थिए ।

युरोपमा हाप्किडोले आफ्नो जरा गाडिसकेपछि यसको विकास एसियन राष्ट्रहरुमा हुन पुग्यो । सर्वप्रथम इन्डोनेशिया, सिङ्गापुर, थाइल्याण्ड, उज्बेकिस्तान, भियतनाम, किर्गिस्तान, काजकिस्तान, मंगोलिया, कम्बोडिया, लाओस र हङकङमा यो खेलको विकास र विस्तार भएको देखिन्छ । त्यसपछि अरेबियन राष्ट्रहरुमा पनि यो खेलले विस्तारै विस्तारै, आफ्नो पकड जमाउन सफल भएको थियो । त्यसको केहि समय पश्चात् यो खेलको विकास अष्ट्रेलिया, दक्षिण अफ्रिका र उत्तर अमेरिका महादेशका राष्ट्रहरुमा हुन पुगेको थियो ।

पछिल्लो समय वि.सं. २०६४ सालमा डोजाङ्गकै रुपमा हाप्किडो खेल नेपालमा भित्रिएपनि २०७३ सालमा मात्रै यसले राष्ट्रिय खेलकुद परिषद् (राखेप) बाट राष्ट्रिय संघको रुपमा मान्यता पाएको थियो । अहिले नेपालमा यो खेल लोकप्रिय बन्दै गहि रहेको छ ।