जब्बरे चौरलाई रङ्गशाला बनाउने गाउँपालिका अध्यक्ष अधिकारीको घोषणा

नुवाकोट । नुवाकोटको तारकेश्वर गाउँपालिका अध्यक्ष शिव अधिकारीले तारकेश्वर गाउँपालिका वडा नम्बर १ दाङसिङमा रहेको जब्बरे चौरलाई खेलकुद रङ्गशाला बनाउने घोषणा गरेका छन् ।

नयाँ वर्षको अवसरमा सिर्जनशील समाज सुधार युवा क्लबद्वारा आयोजित खुला नकआउट फुटबल प्रतियोगिताको समापन कार्यक्रममा सम्बोधन गर्दै अध्यक्ष अधिकारीले आगामी वर्षको बजेटमा रङ्गशाला निर्माणको कार्यक्रम समेटिने बताए ।

उनले कलाकार र खेलाडी देशका गहना रहेको भन्दै खेलाडीहरुलाई ऊर्जा र उत्साह दिनको लागि आफू हरदम प्रयत्नशील रहेको समेत उल्लेख गरे ।

उनले फुटवल प्रतियोगितामा पुरुष र महिला तर्फ प्रथम हुने टोलीलाई प्रोत्साहन स्वरूप १५÷१५ हजार रुपैयाँ, द्वितीय हुनेलाई ८÷८ हजार रुपैयाँ र आयोजक क्लबलाई २४ हजार रुपैयाँ प्रदान गर्ने घोषणा गरे ।

प्रतियोगितामा नुवाकोट र धादिङका ३० भन्दा बढी टिम सहभागी थिए ।