कांग्रेसमा संसदीय दलको नेता चुन्ने तयारी सुरू

नुवाकोट ।  नेपाली कांग्रेसले संसदीय दलको नेता चयन गर्नेबारे छलफल सुरू भएको छ ।

प्रधानमन्त्री एवम् सभापति शेरबहादुर देउवाले शनिबार पार्टीबाट निर्वाचित सांसदहरूलाई सरकारी निवास बालुवाटारमा बधाई ज्ञापन र चियापानको कार्यक्रम राखेका थिए । त्यसक्रममा संसदीय दलको चुनाव र भावी सरकार गठनबारे समेत नेताहरूबीच कुराकानी भएको थियो ।

निर्वाचन आयोगले निर्वाचनको अन्तिम परिणाम बुझाइसकेको भए पनि समानुपातिकबाट निर्वाचित सांसदहरूले प्रमाण पत्र पाइसकेका छैनन् । सांसद्हरूको शपथग्रहण समेत भइसकेको छैन । कांग्रेस प्रवक्ता प्रकाशसरण महतले सांसद्हरूले प्रमाणपत्र बुझेलगत्तै संसदीय दलको नेता चयनको प्रक्रिया अघि बढ्ने बताए ।

‘प्रमाण पत्र र शपथ ग्रहणको कार्यक्रम हुनै बाँकी छ । हामी सरकार गठनभन्दा पहिल्यै संसदीय दलको नेता चुनेर जाने पक्षमा छौँ,’ उनले भने, ‘केही दिनभित्रै पार्टीको केन्द्रीय कार्यसम्पादन समिति बस्दैछ, बैठकले संसदीय दलको नेता चयन गर्ने विषयमा निर्णय लिन्छ ।’

निर्वाचन आयोगले चुनावको परिणामसहितको प्रतिवेदन राष्ट्रपति कार्यालयमा बुझाएपछि नयाँ सरकार गठनको बाटो खुलिसकेको छ । कांग्रेस नेताहरूले भने संसदीय दलको नेता चयन भएपछि मात्रै सरकार गठनको प्रक्रिया अघि बढ्ने दाबी गरेका छन् ।

देउवानिकट केन्द्रीय सदस्य रामहरि खतिवडा सभापति देउवाले संसदीय दलको नेता बनेपछि मात्रै सरकारको नेतृत्व गर्ने बताउँछन् । ‘सांसद्हरूको सपथ पहिले कि सरकार पहिले ? यसबारे अहिले निर्क्योल भइसकेको छैन, तर कांग्रेसमा यसबारे अलमल छैन,’ खतिवडाले भने, ‘हामी पहिले संसदीय दलको नेता छान्छौँ, अनिमात्रै सरकारको नेतृत्व गर्ने हुन्छ ।’