विदुरमा डेंगु सार्ने लामखुट्टेको लार्भा नष्ट गर्ने अभियान शुरु

नुवाकोट । विदुर नगरपालिकाले नगरपालिकाको केही क्षेत्रमा डेंगुको जोखिम बढेको भन्दै जोखिम क्षेत्रमा लामखुट्टेको बासस्थान खोजेर लार्भा नष्ट गर्न शुरु गरेको छ ।

विदुर नगरपालिकाको स्वास्थ्य शाखाको आयोजनामा जिल्ला समन्वय, प्रहरी, प्रशासन र स्थानियको पहलमा रोगको संक्रमणबाट बच्नका लागि लार्भा नष्ट गर्ने अभियान शुरु गरिएको हो ।

नगरपालिकाको केही वडाहरु डेंगु रोगको उच्च जोखिममा रहेकोले नगरपालिकामा डेंगु रोगको प्रकोप बढ्नसक्ने भएकाले सचेतनामूलक कार्यक्रमसहित डेंगु सार्ने लामखुट्टेको बासस्थान खोजेर लार्भा र प्यूपा नष्ट गर्ने अभियान शुरु गरिएको नगरपालिकाका मेयर राजन श्रेष्ठले जानकारी दिए ।

डेंगु सार्ने लामखुट्टेको बासस्थान खोजेर लार्भा तथा प्यूपा नष्ट गर्ने अभियान अन्तर्गत सबै क्षेत्रमा महिला स्वास्थ्य स्वयंसेविका र स्वास्थ्यकर्मीेसहित खटिएका छन् ।

अभियान अन्तर्गत वडाका प्रत्येक टोल–टोलमा पुगेर लामखुट्टेको लार्भा नष्ट गर्ने औषधी छर्किनुका साथै सर्वसाधारणमा सचेतना अभिबृद्धिका कार्यक्रम गर्ने विदुर नगरपालिकाको स्वास्थ्य शाखाले जनाएको छ ।

कार्यक्रममा नगरपालिकाका उपमेयर प्रभा बोगटी, वडाध्यक्षहरु जनप्रतिनिधी, शाखा प्रमुख, प्रहरी, स्वास्थ्य क्षेत्रमा सक्रिय संघसस्थाहरुको सहभागितामा रहेको थियो ।

आजदेखि शुरु भएको अभियान एक सातासम्म संचालन हुने बताइएको छ ।