आइतबार बिदा गर्दा पेट्रोलको खपत ११ प्रतिशतले घट्यो : निगम

नुवाकोट ।  नेपाल आयल निगमका कार्यकारी निर्देशक उमेशप्रसाद थानीले जेठ महिनामा आइतबार बिदा गर्दा पेट्रोलको खपत ११ प्रतिशतले घटेको बताएका छन् ।

सोमबार उद्योग, वाणिज्य तथा आपूर्ति मन्त्रालयमा आयोजित पत्रकार सम्मेलनमा निर्देशक थानीले चैतमा पेट्रोल खपत ६३ हजार किलोलिटर रहेकोमा वैशाखमा बढेर ६७ हजार किलोलिटर पुगेको तर जेठमा घटेर ५९ हजार किलोलिटरमा झरेको बताए । 

‘वैशाख महिनामा भन्दा जेठ महिनामा पेट्रोलको खपत ११ प्रतिशतले घटेको छ । चैतमा पेट्रोल खपत ६३ हजार किलोलिटर थियो । वैशाखमा बढेर ६७ हजार किलोलिटर पुगेको थियो । तर जेठमा भने घटेर ५९ हजार किलोलिटरमा झरेको छ,’ निर्देशक थानीले भने । सरकारले इन्धन खपत कम गर्न भन्दै जेठ महिनामा आइतबार पनि सार्वजनिक बिदा दिने निर्णय गरेको थियो । सरकार आइतबार बिदा दिने निर्णयबाट पछि हटिसकेको छ । असार १ गतेदेखि आइतबारको बिदा कटौती भएको छ ।

त्यस्तै निर्देशक थानीले आयल निगमले छिट्टै ग्यासमा घरायसी र औद्योगिक प्रयोजनका लागि अलगअलग मूल्य तोकेर जाने बताए । औद्योगिक प्रयोजन र घरायसी प्रयोजनको ग्यास सिलिन्डर चिन्न सिलिन्डरको आकार, ग्यासको गन्ध र सिलिन्डरको रङ फरक बनाउने उनले जानकारी दिए । ग्यासमा दोहोरो

मूल्य कायम गर्नुका लागि गुणस्तर तथा नापतौल विभागको महानिर्देशकको नेतृत्वमा विज्ञ सदस्य सहितको समितिले अध्ययन गरिरहेको पनि उनले बताए ।