नुवाकोट दरबार अझै पुनर्निर्माण हुन सकेनन्

नुवाकोट ।  कहिले भूकम्प त कहिले कोरोनाका कारण नुवाकोटको साततले दरबार लगायतका पुरातात्त्विक सम्पदाहरूको पुनर्निर्माण हुन सकेको छैन । चीन सरकारको सहयोगमा निर्माण हुने भनिएको साततले दरबार पुनर्निर्माण हुन नसक्दा स्थानीयवासी चिन्तित छन् । 

पुरातात्त्विक सम्पदाको अवलोकन गर्न बाह्य तथा आन्तरिक पर्यटक आउने गरेको नुवाकोट अहिले सुनसान भएपछि पुरातात्त्विक सम्पदा नबन्ने हो कि भन्ने चिन्ताले सताएको स्थानीय शिव मल्लले बताए । भूकम्पले ढलेका पुराना घरहरू नयाँ बने तर यहाँका दरबार र मठमन्दिर पुनर्निर्माण नहुँदा स्थानीयमाझ निराश थपिएको उनले बताए ।

यहाँका दरबार तथा मठमन्दिर पुनर्निर्माण नभए नुवाकोटको अस्तित्व मेटिने उनले बताए । विदुर नगरपालिका २ मा पर्ने उक्त दरबार र मठमन्दिर चीन सरकारले पुनर्निर्माण गर्न भने पनि कोरोनाका कारण पुनर्निर्माण हुन सकेको छैन ।

पुनर्निर्माण गर्नुपर्ने सम्पदाहरूमा साततले दरबार लगायत लामपाटी, सेतो पाटी, विष्णु मन्दिर, नारायण मन्दिर, गारद घर, रंगमहल, तलेजुभवानी मन्दिर छन् । २०७२ वैशाख १२ र २९ गते आएको भूकम्पले ती सम्पदाहरूमा क्षति पुगेको थियो । अहिले ती सम्पदालाई फलामे टेको दिएर राखिएको छ ।

त्यतिबेला ती सम्पदाहरू पुनर्निर्माण गर्नका लागि नेपाल सरकार र चीन सरकारसँग सम्झौता भएको थियो । राष्ट्रिय पुनर्निर्माण प्राधिकरणले काठमाडौंको बसन्तपुर दरबार पुनर्निर्माण सकिएपछि नुवाकोटका सम्पदाको पुनर्निर्माण थालिने जनाएको थियो । तर‚ पुनर्निर्माण प्राधिकरणको अवधि सकिएर पनि नुवाकोटका पुरातात्त्विक सम्पदाले जुनी फेर्न पाएनन् ।