आइसोलेसन केन्द्रलाई पन्डित परिवारको २ थान अक्सिजन मेसिन

नुवाकोट ।  नुवाकोटको तारकेश्वर गाउँपालिकाको स्वर्गीय रामप्रसाद पण्डितको सम्झनामा परिवारबाट गाउँपालिकाको वडा नं ४ मा सन्चालित आइसोलेसन केन्द्रलाई अक्सिजन मेसिन प्रदान गरिएको छ ।

स्वर्गीय रामप्रसाद पण्डितको सम्झनामा गोविन्द प्रसाद शर्मा पण्डित, माधबप्रसाद शर्मा पण्डित र बद्रीप्रसाद शर्मा पण्डित एवम् परिवारको तर्फबाट खरिद गरिएको २ थान विद्युतिय अक्सिजन मेसिन आइसोलेसन केन्द्रलाई प्रदान गरेको स्वर्गीय पण्डितको परिवारले बताएका छन् ।

पछिल्लो समयमा देशव्यापी रूपमा फैलिरहेको कोरोना महामारी नुवाकोटको तारकेश्वर गाउँपालिकामा पनि तिव्र गतिमा बढीरहेकोले गाउँबासीको जीवन रक्षार्थ अक्सिजन मेसिन प्रदान गरेको स्वर्गीय पण्डितको एक छोराले जानकारी दिए ।

तारकेश्वर गाउँपालिका अध्यक्ष रमेश वस्तीको उपस्थितिमा गाउँपालिकाको वडा नं ४ को आईसोलेशन केन्द्रलाई प्रदान गरिएको अक्सिजन मेसिन कोभिड १९ पछि स्वास्थ्य चौकी बुधसिङमा रहने गरि हस्तान्तरण गरिएको हो ।