जनताले तिरेको कर नगरबासीको बिकासको लागि नै भएको उपप्रमुख गिता दाहालको भनाई

विदुर, विदुर नगरपालिकाले गत असार १० गते नगरसभाबाट पारित गरेको एकिकृत सम्पत्ति करलाई जनताको चाहाना अनुरुप संशोधन गर्ने संकेत गरेको छ ।

नगरपालिकाले एकिकृत सम्पत्ति कर बढाएको भन्दै नगरवासीले विरोध जनाएपछि लगाएको एकिकृत सम्पत्ति करको विषयमा संशोधन गरेको विदुर नगरपालिकाका उपमेयर तथा राजश्व समितिका प्रमुख गिता दाहालले बताउनुभएको छ । बिदुर नगरपालिकाका उपमेयर दाहालले ८० प्रतिशत जनताले नगरपालिकाले लगाएको एकीकृत सम्पति करलाई स्वीकार गरेको दाबी गर्दै केही स्थानीयवासीहरु मर्कामा परेको र जनभावना अनुसार नगरपरिषदकोे बैठकले गरेको निर्णय परिमार्जन गर्ने संकेत गर्नुभएको हो । उहाँले अब नगरपालिकाबाट कार्यान्वायन हुने कानुन संघ र प्रदेशसँग नबाजिने बनाउने प्रक्रिया भैरहेको जानकारी दिनुभएको छ ।

यस्तै, उहाँले नगरपरिषदले बढाएको करले नगरपालिकाका ग्रामीण भेगका केही जनता मर्कामा परेको स्वीकार गर्दै नगरपलिकाले छिट्टै बैकल्पिक निर्णय गर्ने बताउनुभएको छ । उहाँले करको विषयमा विदुर नगरपालिका महत्वकांक्षी नभएको भन्दै आफुहरुले जनतालाई विकास निर्माणको काममा योगदान दिन र जिम्मेवार बनाउन केही मात्रामा कर लगाएको बताउनुभएको छ । उहाँले जनताले तिरेको कर नगरपालिकाको बिकास र नगरबासीको सुबिधाका लागी नै तिरेको भन्ने चेतना जनतामा जगाउन आबश्यक रहेको बताउनुभएको छ ।

उहाँले नगरपालिकाको दिगो विकासको लागि जनताको सहभागिता विना संभव नभएको भन्दै जनसहभागिता बढाउन करको दायरामा मात्र ल्याउन खोजेको धारणा ब्यक्त गर्नुभएको छ । विदुर नगरपालिकाले एकिकृत सम्पत्ति कर बढाएको भन्दै अहिले जिल्लाभर विरोध भइरहेको छ भने प्रमुख प्रतिपक्ष दल नेपाली कांग्रेसले आन्दोलन समेत गरिरहेको छ ।