नुवाकोटमा कोरोना संक्रमितको संख्या ३ सय ८० पुग्यो

नुवाकोट । नुवाकोटमा कोराना संक्रमितको संख्या ३ सय ८० पुगेको छ ।

स्वास्थ्य कार्यालय नुवाकोटका अनुसार पछिल्लो २४ घण्टामा जिल्लामा ११ जना कोरोना संक्रमित थपिएसँगै जिल्लामा कोरोना संक्रमितको संख्या ३ सय ८० पुगेको हो । कार्यालयका सुचना अधिकारी उत्तमराज खनालका अनुसार पछिल्लो २४ घण्टामा जिल्लाको तादी गाउँपालिकाका ९ पुरुष र एक महिला तथा सुर्यगढी गाउँपालिकाका एक पुरुषमा कोरोना संक्रमण देखिएको हो । खनालका अनुसार संक्रमितमध्ये ७ जना होम आइसोलेसनमा र ४ जना अस्पतालको आइसोलेसनमा उपचार गरिरहेका छन् ।

कार्यालयका सुचना अधिकारी खनालका अनुसार नुवाकोटमा कोरोनाका सक्रिय संक्रमितको संख्या २ सय २६ पुगेको छ । जसमध्ये अस्पतालको आइसोलेसन वार्डमा २३ जना, आइसोलेसन सेन्टरमा १४ जना र होम आइसोलेसनमा एकसय ८९ जना रहेका छन् ।

त्यस्तै पछिल्लो २४ घण्टामा जिल्लाका एक जना कोरोना संक्रमित निको भएर घर फर्किएका छन् । उनी काठमाण्डौको आइसोलेसन वार्डमा उपचार गरिरहेका थिए । यससँगै नुवाकोटमा कोरोना निको भएर घर जानेको संख्या एकसय ५३ पुगेको छ जसमध्ये एकसय १७ पुरुष र ३६ महिला रहेका छन् ।

हालसम्म नुवाकोटका ५ हजार ८ सय एक जनाको पिसिआर संकलन गरिएको स्वास्थ्य कार्यालय नुवाकोटले जनाएको छ ।