अनशन तोडे पनि गंगामाया अस्पतालमै

काठमाडौं ,छोराको हत्यारालाई कारबाहीको माग गर्दै आउनुभएकी गंगामायाको अनशन शुक्रबारबाट तोडिएको छ । उहाँ वीर अस्पतालमा अनशन बस्नुभएको थियो ।

राष्ट्रिय मानवअधिकार आयोगका अध्यक्ष अनुपराज शर्माले जुस खुवाएर अनशन तोडाउनुभएको हो । त्यसअघि कानुनमन्त्री शेरबहादुर तामाङद्वारा हस्ताक्षरित २ बुँदे पत्र पनि गंगामायालाई दिइएको थियो ।

पत्रमा २०७२ असोजमा जनाइएको ५ बुँदे प्रतिबद्धता कार्यान्वयन गर्ने उल्लेख छ । साथै गंगामायाले र सरकारले तोकेको प्रतिनिधि रहेको अनुगमन समिति बनाउन त्यसको अनुगमन गरी प्रतिवेदन बनाउने पनि पत्रमा उल्लेख छ ।

कानुनमन्त्री तामाङले गंगामायाको अनशन तोडिएको र गंगामायाले यसअघि गरिएका सहमति पालना गर्न सरकारलाई आग्रह गर्नुभएको जनाउनुभयो ।
‘विगतका सहमति पालना नभए फेरि पनि अनशन बस्छु भन्नुभएको छ, सरकार यसबारे गम्भीर छ’ –तामाङले भन्नुभयो ।

हत्या आरोपमा संलग्न भएका भनिएका छविलाल पौडेल सर्वोच्च अदालतमा आइतबार उपस्थित भएपछि डिल्लीबजार कारागार पठाइएको छ । पौडेलसँगै आरोपित अन्य अदालत उपस्थित भए पनि पौडेल भने यस अघि अदालतमा उपस्थित हुनुभएको थिएन ।

छोरा कृष्णप्रसादको हत्यामा संलग्नलाई कारबाहीको माग गर्दै वीर अस्पतालमा अनशन बसिरहेका बुबा नन्दप्रसादको ३ सय २९ दिनपछि २०७१ असोज ६ गते निधन भएको थियो । नन्दप्रसादकी श्रीमती गंगाामाया भने अस्पतालमै अनशनरत हुनुहुन्थ्यो । गंगामाया र नन्दप्रसादले सँगै अनशन सुरु गर्नुभएको हो ।

कृष्णप्रसादको २०६१ साल जेठ २४ गते माओवादीले चितवनमा हत्या गरेका थिए । घटनाका दोषीलाई कानुनी कारबाही नभएको भन्दै परिवारले अझैसम्म शव उठाउन मानेका छैनन । शवको दाहसंस्कार नहुँदा काजकिरिया पनि भएको छैन । नन्दप्रसादको शव त्रिवि शिक्षण अस्पताल महाराजगन्जमा राखिएको छ ।

गंगामायाको अनशनलाई नजिकबाट हेर्दै आउनुभएका र उहाँको जीवनरक्षाका लागि आवाज उठाउदै आउनुभएका नेपाल मानव अधिकार संगठनका अध्यक्ष इन्द्रप्रसाद अर्यालले गंगामाया अनशन तोडे पनि अस्पतालमै रहेको र उहाँको बसोबासको लागि सरकारले व्यवस्था गरिदिनुपर्ने बताउनुभयो ।

‘उहाँ अस्पतालमै हुनुहुन्छ, कहाँ जाने भन्ने टुंगो छैन, सरकारले ध्यान दिनुपर्छ’, अर्यालले भन्नुभयो– ‘सहमति गरेका बुँदा पुरानै हुन्, सरकारले पूरा गर्न चासो दिनुको विकल्प छैन ।’